Линктер

ЧУКУЛ КАБАР!
16-июль, 2020 бейшемби, Бишкек убактысы 20:49

Түз ободо Өкмөт пневмонияны COVID-19га кошуп эсептемей болду


Корутунду

"Азаттык" радиосу коронавирус пандемиясына байланыштуу Кыргызстандагы жана дүйнөдөгү маалыматтарды тынымсыз жарыялап, андан коргонуу жолдору тууралуу да материалдарды даярдап келе жатат.

16-июль, бейшемби, эртең мененки саат 10:00гө карата маалымат:

Коронавирус 521 адамга жукканы аныкталды, 7 киши каза болду. Вирусту жугузгандардын жалпы саны - 12 498. Көз жумгандардын жалпы саны 167. Илдеттен жалпысынан 5632 адам айыкты.

Өпкөсү кагынып ооруган 41 адам каза тапты. Март айынан бери 612 бейтап кайтыш болду. 3314 адам айыкты.

Изоляцияда 6 017 адам бар. Стационарда 682 бейтап дарыланууда. 16 адам реанимацияда жатат.

Бул сандар улам жаңыланып турат. Дүйнөдөгү кырдаалды бул шилтемеден билсеңиз болот.

16:38

Өпкөсүнөн кагынып (пневмония) ооруп жаткандар да коронавирус деп катталышы керек. Саламаттык сактоо министрлиги ушундай буйрук чыгарганын 16-июлда вице-премьер-министр Аида Исмаилова билдирди:

“Саламаттык сактоо министрлиги COVID-19 боюнча улуттук клиникалык колдонмонун үчүнчү версиясын бекитти. Аны эксперттер тобу иштеп чыккан. Бул колдонмо бейтаптарды коронавирустан, анын ичинде пневмониядан стационардык жана амбулатордук шартта дарылоо алгоритминен турат. Дүйнөлүк саламаттык сактоо уюмунда кабыл алынган Оорулардын эл аралык классификациясына ылайык, 07 классы өзгөчө кырдаал шартында колдонулат. COVID-19 лабораториялык жол менен тастыкталган U07.1 кодуна жана лабораториялык жол менен тастыкталбаган, бирок белгилери байкалган, рентгенден көрүнгөн U07.2 кодуна карайт деп бекитилген. Коронавирустук инфекцияны дарылоодо бирдиктүү ыкманы колдонуу үчүн Саламаттык сактоо министрлиги буйрук чыгарды. Ал буйрукка ылайык, пневмония U07.2 кодуна карайт. Ошентип, пневмония боюнча статистика COVID-19 деп эсептелет”.

Март айынан бери Кыргызстандын ооруканаларында, расмий эсеп боюнча, пневмониядан 612, коронавирустан 167 адам кайтыш болду. Клиникаларда орун жок болгондуктан көбү үйүнөн дарыланып, каза болуп жатышканы тууралуу кабарлар социалдык түйүндөргө жарыяланууда.

Буга чейин бир топ адистер өлкөдө өпкөсүнөн кагынып ооруган, бирок анализинен коронавирус табылбаган бейтаптардын баарын COVID-19 катары дарылоо керектигин айтып чыгышкан.

“Илимий-консультациялык комитет” бирикмеси Коронавируска каршы республикалык ыкчам штабга кайрылып, коронавирус менен пневмонияны өз-өзүнчө эмес, чогуу кароого чакырган. Коронавирустун статистикасында кош стандартуулук болуп жатканы, дарылоонун ийгилиги диагноздун туура коюлушунан гана көз каранды экенин белгилеген.

Ал эми милдеттүү медициналык камсыздандыруу фондунун төрагасынын орун басары Акылбек Калыков 16-июлдагы онлайн брифингде өлкөдө пневмония жана COVID-19 илдетине кабылгандар акысыз дарылана турганын билдирди.

“Кыргыз жарандары үчүн пневмония жана COVID-19 диагноз менен ооруган бейтаптарды акысыз дарылоо тууралуу чечим кабыл алынды”.

Калыковдун айтымында, күндүзгү стационарларда иштеп жаткан дарыгерлерге кенемте төлөнөт. Жыл башынан бери республикалык бюджеттен Милдеттүү медициналык камсыздандыруу фондуна кенемте төлөмдөргө 233,7 миллион сом бөлүнгөн.

Өлкө боюнча 20 миңден ашык медициналык кызматкер ( 5308 дарыгерлер, 9556 орто медкызматкер, кенже медкызматкер 3398, 2671 ар кандай кызматкерлер) кенемте алышты. Инфекциянын очогунда иштеген медкызматкерлерге жалпы 503,6 млн. сом өлчөмүндө кенемте төлөндү.

Расмий маалыматка караганда, 16-июлда өлкө боюнча 96 медициналык кызматкер коронавирус жуктуруп алганы аныкталды. Жалпысынан республикада 2076 медициналык кызматкерден коронавирус табылып, анын 583ү айыкты. Өкмөт алты медициналык кызматкер коронавирус менен күрөшүп жүрүп, илдет жуктуруп алгандан кийин каза болгонун маалымдаган. Бирок расмий эмес маалыматтарда коронавирус козгогон пневмониядан каза болгон ак халатчандардын саны мындан бир топ көп.

10:29

Кыргызстандын ооруканаларында кечээтен бери коронавирустан жети, пневмониядан 41 бейтап каза болду. Бул тууралуу 16-июлда Саламаттык сактоо министрлигинин өкүлү Айнура Акматова билдирди.

Коронавирустан каза болгон жети адам: Бишкектеги Кыргыз-түрк ооруканасында 78 жаштагы эркек, Баткен облустук ооруканасында 71 жаштагы аял; Нарын облустук ооруканасында 72 жаштагы аял, Жайыл аймактык ооруканасында 42 жаштагы аял жана 63 жаштагы эркек, Кара-Буура аймактык ооруканасында 79 жаштагы эркек жана Панфилов райондук жалпы дарыгерлик тажрыйба борборунда 53 жаштагы эркек.

Пневмониядан бир суткада кайтыш болгондордун 21и Бишкекте, калгандары аймактарда. Март айынан бери өпкөсүнөн кагынып көз жумгандардын саны 612 адам болду. Жалпысынан мындай диагноз менен март айынан бери ооруканага 9204 адам жаткырылганы 15-июлда айтылган. Кечээтен бери бул оорудан дарыланып жаткан 379 бейтап айыгып, үйүнө чыкты. Бардыгы болуп 3794 бейтап айыгып кетти.

Коронавирустан кайтыш болгондордун жалпы саны 167 адам. Жалпысынан эпидемия башталгандан бери бул илдетке 12498 кыргызстандык чалдыкты, алардын 521и соңку бир күндө катталды. Дарыланып жаткандардын 75и бир сутка ичинде үйүнө чыгарылып, бул боюнча жалпы көрсөткүч 3735 адам болду.

Адистер азыр денеси ысып, жөтөлгөндөрдүн баары коронавирус экенин айтып жатышат. Бийлик пневмония менен коронавирустун статистикасын бөлүп кароодо.

09:32

Жогорку Кеңештин депутаты Жанар Акаев өкмөт башчы Кубатбек Бороновду жана жалпы эле бийликти обсервациялардагы, ооруканалардагы жана күндүзгү стационарлардагы абалга көз салып, андагы башаламандыктарга көңүл бурууга чакырды. Депутат 15-июлда Бишкектин четиндеги мурдагы "Ганси" аба базасынын ордуна ачылган “Семетей” обсервациясына барып, абалы менен таанышып келген:

“Таптакыр тартип жок. Оорулуулар, врачтар менен бейтаптардын тууган-уругу аралашып эле жүрүшөт. Көзөмөлдөп койгон киши жок. Орусиядан келген дарыгерлер иштеп жатышкан экен, мага акыбалды айтып, кадимкидей ыйлашты. Эгер мындай болсок биз дагы бир-эки жылдап оору менен алышабыз деп жатышат”.

“Семетей” обсервациясындагы антисанитариялык абал, оор абалда жаткандар менен башкалар аралашып жүргөнүн, ар кандай таштандылар чыгарылбай жатканын 13-июлда ыктыярчы Эрнест Бөрүбаев да тасмага тартып Интернетке жарыялаган.

09:31

Дүйнөлүк саламаттык сактоо уюму Түркмөнстандагы пневмония тууралуу кабарларга тынчсызданып жатканын билдирип, бийликти COVID-19 өлкө ичинде бардай эле чараларды кабыл алууга чакырды.

Түркмөнстанда расмий түрдө коронавирус каттала элек. 10 күн мурда Ашхабадга Дүйнөлүк саламаттык сактоо уюмунун атайын миссиясы барган. Алар бир катар ооруканаларды, лабораторияларды жана чек аралаш аймактарды кыдырышты.

14-июлда миссиянын жетекчиси Кэтрин Смолвуд бийликти өпкө инфекциялары менен катталган жарандарды обочого алып, алар байланышта болгон адамдарды текшерүүгө, калкка вирустук инфекциялар тууралуу маалыматтарды жеткирип, алардын коргонуу чараларын түшүндүрүүгө чакырды.

Уюмдун өкүлдөрү барганда Ашхабад бир катар эпидемиологиялык чараларды киргизген. Ири дүкөндөр, базарлар, мечиттер жабылды, Мары шаарында той-аштарга тыюу салынды.

Жарандар көчөгө беткап тагынып чыгууга милдеттендирилди. Бийлик муну “өпкөгө чаң киргизбеш үчүн” деп түшүндүргөн. Бир күн мурда поезд каттамдары токтотулду. Анын себеби айтылган жок.

“Азаттыктын” түркмөн кызматынын кабарчылары Түркмөнстандын ооруканалары пневмония менен ооругандарга толуп калганын, арасында көз жумгандар көп экенин маалымдап келатышат.

Дагы жүктөңүз

Пикирлерди көрүңүз (275)

XS
SM
MD
LG