Украинанын президенти Владимир Зеленскийдин Улуу Британияга сапары учурунда Карл III жана премьер-министр Энди Бернем менен жолугушуу пландалып, коопсуздукка байланыштуу маселелер талкууланат.
"Биз өзүбүздү бекемдей турган чечимдерди даярдап жатабыз", - деп жазды Зеленский.
Бул жолугушуу Украина менен АКШнын ортосундагы мамилелерде жаңы кризис орун алып жаткан учурга туш келди. Американын президенти Дональд Трамп жакында эле Зеленскийди АКШнын өтүнүчтөрүнө карабастан Орусиядагы мунай иштетүүчү заводдорго сокку урууну улантып жатат деп айыптаган. АКШнын администрациясы, бул аракеттер дизел баасынын жогорулашына алып келип жатканын билдирген. Ошондой эле Трамп Украинада президенттик шайлоо өткөрүүгө чакырды. Кийинчерээк АКШ президенти Орусия менен Украинанын ортосундагы "энергетикалык элдешүү" (ок атышууну токтотуу) тууралуу жазды. Бирок мындай макулдашууга жетишилгенин Москва да, Киев да ырастаган жок. Акыркы сутка ичинде Орусия энергетикалык инфратүзүмдөргө баллистикалык ракеталар менен сокку урууну улантууда.
Ошону менен катар АКШ Орусиянын дизелин импорттоого уруксат берген. Вашингтондун акыркы чечимдери Киевдин жана Европа Биримдигине мүчө көптөгөн өлкөлөрдүн сынына кабылды. Лондон Трампты ачык сындоодон карманып жатканы менен, Британиянын расмий өкүлдөрү Украинаны колдой турганын жана бул өлкөгө көрсөтүлүүчү жардамды көбөйтөрүн билдиришти.
Братан өкмөтү Энди Бернем украин президенти Владимир Зеленскийди кабыл аларын жана "Украинага канча зарыл болсо ошончо колдоо болорун" билдирди. Бернем Зеленскийге Орусияга каршы кошумча санкцияларды, Украинага жакынкы жумаларда жеткириле турган аскердик жана каржылык жардам топтомдорун даярдоо боюнча тапшырма бергенин билдирери белгиленүүдө. Ошондой эле абадан коргонуу үчүн өтө зарыл болгон ракеталарды жеткирүүнү тездетет. Мындан тышкары Улуу Британия Орусиянын суюлтулган газын экспорттоого байланыштуу деңиз кызматтарына толук тыюу салуу пландарына берилгенин дагы бир жолу ырастайт.
The Telegraph бюасылмасы Бернем бул жолугушууда Украинага британиялык көп максаттуу ракета жөнөтүүнү тездетерин жарялай турганын жазды. Бул ракеталар Орусиянын реактивдүү дрондоруна каршы өзүн жакшы көрсөткөн. Мындан сырткары бул жолу 45 млн фунт стерлинг турган жардамдын пакетин жарыялай турганы белгиленген.
15-16-октябрда Европа Биримдигинин саммити өтөт. Анда Украинага жардам көрсөтүү күн тартибиндеги негизги маселелердин бири болот. Азырынча ага Зеленскийдин катышар-катышпасы расмий айтыла элек.
Украина14-октябрга караган түнү Орусиянын Саратов облусундагы Балаково шаарына дрондор менен сокку урду.
Саратов облусунун губернатору Роман Бусаргин Балаководо бир адам каза болуп, бир нече турак жайга зыян келтирилгенин билдирди. Анын дагы бир маалыматына ылайык, шаардын бардык инфраструктуралык объектилери кадимки режимде иштеп жатат.
Astra басылмасынын маалыматына караганда, зыян келтирилген үйлөрдүн бири Балаково ЖЭБинен үч чакырым алыстыкта жайгашкан. Бул станция шаарды жылуулук менен камсыз кылуучу негизги объект болуп саналат.
Украинанын Exilenova+ жана Supernova+ мониторинг каналдарынын билдиришинче, Сбербанктын маалымат борбору (ЦОД) жана "МЗ Балаково" металлургиялык заводу бутага алынган.
Эки объект тең Балаковонун өнөр жай аймагында жайгашкан. Сбербанк маалымат борборуна чабуул болгонун ырастады.
"Чабуул фактысын ырастайбыз. Банктын бардык системалары кадимки режимде иштеп жатат. Кызматкерлерден эч ким жабыркаган жок", - деп жазды РБК банктын билдирүүсүнө таянып.
Балаководогу Сбербанктын маалымат борборунун курулушу толук аяктай элек. Саратов облусунун Санариптик өнүктүрүү жана байланыш министрлиги объект Орусиядагы эң ири дата-борбор болорун билдирген. Долбоорду толук 2030-жылга чейин бүтүрүү пландалууда, бирок биринчи этабы буга чейин пайдаланууга берилген.
Москва шаарынын мэри Сергей Собянин 14-октябрга караган түнү Москва облусун көздөй 493 дрон учурулганын билдирди. Анын айтымында, алардын көбүн абадан коргонуу күчтөрү атып түшүргөн. 180 дрон жок кылынган.
Орусиянын Коргоо министрлиги Белгород, Брянск, Волгоград, Воронеж, Владимир, Калуга, Курск, Липецк, Новгород, Орёл, Ростов, Рязань, Саратов, Смоленск, Тверь жана Тула облустарынын, Москва аймагынын, Краснодар жана Ставрополь крайларынын, аннексияланган Крымдын, ошондой эле Азов деңизинин аймагына жалпысынан 902 украин дрону учурулганын маалымдады.
Орусиянын аскерлери 13-октябрдын кечинде Киевге баллистикалык ракеталар менен сокку урду. Чабуулдан кийин урандылардын алдынан дагы бир адамдын сөөгү табылып, каза болгондордун саны үчкө жетти.
Киевдин мэри Виталий Кличконун маалыматына караганда, Деснянский районундагы тогуз кабаттуу турак жайдын урандыларынан эки адамдын сөөгү табылган. Жалпысынан 21 киши жабыркап, алардын арасында сегиз жаштагы бала да бар.
Мэрдин айтымында, жараат алгандардын 16сы ооруканага жаткырылды. Төрт адамдын абалы оор деп бааланууда. Чабуулдан кийин көп кабаттуу үйдүн биринчи кабатынан сегизинчи кабатына чейин батирлерде өрт чыгып, жогорку кабаттардагы тургундар эвакуацияланган.
Украинанын президенти Владимир Зеленский ракеталык соккудан турак жайдан тышкары Киевдеги ЖЭБ-4 да жабыркаганын билдирди. Анын айтымында, чабуул алдында Украина өнөктөш өлкөлөрдөн эскертүү алган эмес.
Буга чейин Financial Times басылмасы өз булактарына таянып, АКШ өкүлдөрү Украинанын мунай иштетүүчү заводдорго жасаган соккуларына байланыштуу Киев менен чалгын маалыматтарын бөлүшүүнү токтотуу мүмкүндүгүн эскертишкенин жазган. Бирок кийинчерээк Украинанын тышкы иштер министри Андрей Сибига маалымат алмашуу улантылып жатканын билдирген. АКШ президенти Дональд Трамп да мындай кызматташтык токтотулганын четке каккан.
13-октябрда Украинанын Харьков шаарында ракета соккусу урулган көп кабаттуу үйдүн урандыларынын алдынан дагы бир адамдын сөөгү табылды. Бул тууралуу шаардын мэри Игорь Терехов билдирди.
Анын айтымында, Холодногор районундагы жабыркаган үйдө издөө-куткаруу иштери дагы эле уланууда. Куткаруучулар урандылардын арасында дагы адамдар болушу мүмкүн экенин белгилеп жатышат.
Украинанын Өзгөчө кырдаалдар боюнча мамлекеттик кызматынын маалыматына караганда, 12-октябрдын кечинде орус армиясы Харьковдун Холодногор жана Шевченко райондоруна ракета менен сокку урган. Аткылоодон турак жай кварталдары жана жарандык инфраструктура объекттери жабыркаган.
Ракеталардын бири төрт кабаттуу турак үйгө тийип, кире бериш бөлүгү толугу менен урап түшкөн. Куткаруучулар урандылардын арасынан үч адамды аман алып чыгууга жетишкен. Жалпысынан кеминде 11 адам жараат алганы кабарланган.
Кол салуунун кесепеттерин жоюу учурунда бир куткаруучу да жаракат алып, ооруканага жеткирилген.
Шаардын башка аймактарында дагы кыйроолор жана өрттөр катталган. Окуя болгон жерлерде куткаруучулар, пиротехниктер, кинологдор, полиция кызматкерлери, дарыгерлер, ыктыярчылар жана коммуналдык кызматтар иштеп жатат. Психологдор жабыркагандарга жардам көрсөтүүдө.
Орусиянын Украинага каршы ачкан согушу 2022-жылдын февралынан бери уланып келет. Согуш маалында тараптар жарандык объекттерге сокку урганын четке кагып келишет. Бирок эл аралык уюмдар менен байкоочулар эки тарапта тең жарандардын өлүмүнө жана жарандык инфраструктуранын кыйрашына алып келген чабуулдарды каттоодо.