Линктер

шейшемби, 20-ноябрь, 2018 Бишкек убактысы 06:36

Франция чемпиондугун түнү бою белгиледи


Франциялык оюнчулар. 15-июль, 2018-жыл.

Дүйнө чемпиону болгон Франциянын улуттук курама командасы 16-июлда мекенине кайтты. Жекшемби күнкү матчтын каармандары түшкөн автобус Париждеги Елисей талаасын аралап өтүп, он миңдеген күйөрмандарга баалуу трофейди тартуулашмакчы. Финалда Хорватияны 4-2 эсебинде уткан француздар ушуну менен экинчи жолу дүйнө чемпиондору болушту.

Франция түнү бою футболчулардын жеңишин майрамдады. Финалдык беттешүү аяктаарына саналуу мүнөт калганда, арбитрдин акыркы ышкырыгы угула электе эле Парижден баштап алыскы шаар-кыштактарга чейин бүтүндөй өлкө бир чоң фан-зонага айланып, шаан-шөкөткө бөлөндү.

Жер-жерлерде “Алга, Франция!”, “Биз – чемпионбуз!” деген ураандар, "Марсельеза" жаңырып, мамлекеттик желектер желбиреп турду. Жаш муун үчүн бул биринчи ушундай чоң майрам болуп калды. Бир нече жылдан бери француздар өз желеги астында кайгылуу окуяларда гана биригип келишкен.

Борбор шаардагы Триумфалдык аркадагы дисплейде жаңы чемпиондордун сүрөттөрү көргөзүлүп, Эйфел мунарасы мамлекеттик туунун көк-ак-кызыл түскөрүнө боелуп турду.

Француз күйөрмандарынын майрамы.
Француз күйөрмандарынын майрамы.

Парижде коомдук тартипти сактоого 4 миңдей полиция кызматкери тартылган. Кээ бир жерлерде элдик майрам тополоң менен коштолду. Фанаттар полиция кызматкерлерине таш, бөтөлкө ыргытып жатышты. Тартип коргоочулар аларды жаш агызчу газ менен кууп таркатканга аракеттеништи.

Дүйшөмбүдө гезиттерде “Дүйнөнү багындырган жаш команда”, “Таланттардын жеңиши”, “Сыймык күнү келди” деген өңдүү аталыштагы макалалар жарык көрдү.

Москвадагы Лужники стадионунда өткөн Хорватия менен финалдык оюн кызыктуу, күтүлбөгөн жагдайларга бай болду. Акыр аягында француздар 4-2 эсеби менен жеңип, мындан 20 жыл мурунку ийгилигин кайталашты.

1998-жылы чемпиондукту жеңгендердин арасында азыркы башкы машыктыруучу Дидье Дешам да бар болчу. Эми ал дүйнө чемпиону болгон жана чемпиондорду тарбиялаган тарыхтагы үчүнчү машыктыруучу болуп калды. Дешам оюндан кийинки басма сөз жыйынында 2020-жылдагы Европа чемпионатына чейин команданын башында калаарын билдирди.

Француз күйөрмандарынын кубанычы.
Француз күйөрмандарынын кубанычы.

Франциянын азыркы командасы Орусиядагы турнирге катышкандардын арасынан эң жаш курама команда - алардын орточо курагы 26 жаш. Килиан Мбаппе болсо 19 жашында дүйнө чемпионатында гол киргизген оюнчу катары даңазалуу Пеледен кийинки орунда тарыхка кирди.

ФИФАнын кубогу тапшырылып, медалдарды моюндарына тагынган футболчуларды кийим алмаштырган жайына барып Франция менен Орусиянын президенттери Эммануэл Макрон жана Владимир Путин барып куттукташты.

Бүгүн болсо күйөрмандар Франциянын каармандарын тосуп алыш үчүн кайрадан Елисей талаасына чогулушту. Андан кийин чемпиондорду президенттик сарайда мамлекет башчы Макрон кабыл алмакчы.

"Азаттыктын" материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.
  • 16x9 Image

    Айнура Жекше кызы

    "Азаттыктын" Прагадагы кеңсесинин кызматкери, журналист, котормочу. Кыргыз улуттук университетинин чет тилдер факультетин аяктаган.

Сиздин пикир

пикирлерди көрсөт

XS
SM
MD
LG