Орусия шаршембиге караган түнү Украинанын Кривой Рог шаарына сокку уруп, ызгаарда 45 миң абонентти жарыксыз, 700дөн ашуун үйдү жылуулуксуз калтырды.
Кривой Рогдун коргоо кеңешинин башчысы Александр Вилкул орус армиясынын стратегиялык объектиге соккусунан кийин электр энергиясын авариялык өчүрүүлөр болгонун айтты. Түнү бою калыбына келтирүү иштери жүргүзүлүп, 14-январда түшкө жуук суукта калган элге жылуулук менен электр жарыгы кайра берилгени кабарланды.
Орусиянын Ростов облусунда украиналык дрондордун чабуулунда бир киши өлүп, төртөө жараат алганын, анын бири төрт жашар бала экенин аймактын губернатору Юрий Слюсарь билдирди.
Анын айтымында, жабыркагандар Ростов шаарынын жана Мясников районунун жашоочулары. Баары ооруканага жеткирилген, абалдары орто оор. Каза тапкан кишинин сөөгү дрон тийгени айтылган үйдүн уранды алдынан табылган.
Слюсарь билдиргендей, чабуулдан кийин Ростовдун батыш өнөр жай зонасында өндүрүш жана кампалар күйүп кеткен.
Орус Коргоо министрлиги 13-январь саат 20.00дөн баштап 14-январь саат 9:00гө чейинки аралыкта украиналык 64 дронду атып түшүргөнүн, анын 27си Ростов облусунун аймагында жок кылынганын билдирди.
Орусиянын Украинага "атайын аскердик операция" деп атаган негизсиз кол салуусуна 2026-жылдын 22-февралында туура төрт жылдын жүзү болот. Бул мезгил аралыгында Украинада миңдеген киши бейажал өлүм тапты, миңдегени майып, качкын болуп, үй-жайсыз калды.
Москванын согушуна жооп иретинде Украина Орусиянын армиясын каржылоо булагы деп эсептелген мунай заводдорун маал-маалы менен бутага алып келет.
Орусиянын Ростов облусунун губернатору Юрий Слюсарь 13-январга караган түнү Таганрог шаарына кеминде жети украиналык дрон менен чабуул жасалганын билдирди.
Орусиялык ASTRA Telegram-каналы жергиликтүү тургундардын социалдык тармактардагы билдирүүлөрүнө таянып, аймактагы "Атлант Аэро" заводу жана Бериев атындагы авиациялык оңдоо заводу бутага алынган болушу мүмкүн экенин жазды. Жарыяланган видеолордон бул объектилерде ири өрт чыкканын көрүүгө болот.
Маалыматка караганда, "Атлант Аэро" ишканасы согуштук дрондор үчүн тетиктерди, башкаруу системаларын жана радиоэлектрондук комплекстерин чыгарат. Анын өндүрүшү, өзгөчө, "Орион" дрондорун иштеп чыгууга багытталган.
Таганрог шаарынын мэри Светлана Камбулова аба чабуулунун кесепетинен беш көп батирлүү үй, үч жеке турак жай, эки өнөр жай ишканасы жана алты машинеге зыян келтирилгенин тактады.
Украинанын Куралдуу күчтөрүнүн Башкы штабы Таганрогдогу "Атлант Аэро" заводуна сокку урулганын ырастады. Украин армиясы бул ишкананы буга чейин да бутага алган. Маалыматка ылайык, завод 2025-жылдын июнь жана ноябрь айларында да дрон чабуулуна кабылган.
Ал эми Орусиянын Коргоо министрлиги 13-январга караган түнү 89 украиналык дрон атып түшүрүлгөнүн маалымдады.
Украин армиясы Орусиядагы согушту колдогон, каржылаган аскердик жана башка жайларга сокку уруп келет.
Одессанын борборунда эки жолку чабуулдан беш киши жараат алды
Бул тууралуу Украинанын Одесса шаардык аскердик администрациясынын башчысы Сергей Лысак кабарлады. Анын айтымында, 13-январга караган түнү Орусиянын армиясы Одессанын борбордук бөлүгүнө эки жолу сокку урган. Анын кесепетинен турак жайлар жана социалдык объекты: оорукана, бала бакча, мектепке зыян келтирилди. Азырынча беш киши жараат алганы тууралуу маалымат бар.
Түндө Украинанын Аба күчтөрү Одессаны көздөй жанкечти дрондор учурулганын билдирген.