Жол буугандарга

Теңдик үчүн өз жанын кыйып келген,
Тентектерин тентитпей тыйып келген,
Жоболоңдуу жоокердик доорунда да
ЖОЛ дегенди көчмөндөр ыйык көргөн.

Эрендери жоо көрсө каптачу эле,
Энелери каадасын сактачу эле.
Жолоочунун алдына даамын коюп,
Жол-жобосун андан соң тактачу эле.

Азыр чыкты ар кимге кашынгандар,
Атак үчүн жол тосуп ашынгандар.
Каршысына касташса тик чыга албай
Катындардын артына жашынгандар.

Жолдо жүрүп өмүрлөр тамам болот.
Жол сыйлаган улуу журт аман болот.
«Жолуңду ачсын!» деп бабам бата берген.
Жол буугандын акыры – жаман болот.

Таарынганы – Таласка жатып алсын!
Талашканы – Ташкенге батып алсын.
Элдин баарын дүрбөтпөй, мага демектен
Эки жаман бири бирин атып алсын.

Жарандар эй, жарандар, токтогула!
Жашообузга жаман салт кошпогула.
Кызмат үчүн кырылып кетишсе да
Кыргызымдын кан жолун тоспогула.

Жыргалбек Касаболотов, Бишкек