Линктер

ЧУКУЛ КАБАР!
29-Март, 2024-жыл, жума, Бишкек убактысы 10:54

Франциялык журналист Стросс-Канды сотко берет


Стросс-Кан 1-июлда Нью-Йорк сотунун чечими менен үй камагынан бошотулган.
Стросс-Кан 1-июлда Нью-Йорк сотунун чечими менен үй камагынан бошотулган.

Эл аралык валюта корунун мурдагы жетекчиси Доминик Стросс-Канга каршы дагы бир кылмыш иши ачылышы ыктымал. Бул жолу франциялык жазуучу жана журналист Тристан Банон 2003-жылы аны зордуктоого аракеттенген деп айыптап жатат. Стросс-Кандын адвокаттары болсо журналистти жалаа жабуу үчүн сотко беришээрин айтышууда.

Бир кездери Франциянын Экономика жана каржы министрлигин жетектеген, Социалисттер партиясынын барандуу өкүлдөрүнөн болуп эсептелген саясатчы жана финансист Доминик Стросс-Кан май айында сексуалдык кылмыш үчүн айыпталып, Эл аралык валюта фондунун директорлугунан өз ыктыяры менен кетүүгө аргасыз болгон.

Бир нече күн мурун Нью-Йорк шаарынын соту аны зордуктоо аракети үчүн айыптаган аялдын көрсөтмөлөрү күмөн туудураарын, ал буга чейин бир нече жолу калп айтканын жүйө келтирип, Стросс-Канды үй камагынан бошоткон. Арийне, сот иши кыскартыла элек, ал толугу менен акталды деп айтууга азырынча эрте.

Тристан Банон

Бир аз жеңилдей түшкөн экс-төраганы эми Францияда сотко бергени жатышат. 32 жаштагы жазуучу жана журналист Тристан Банон 2003-жылы ал кезде министр болуп турган Стросс-Кандан интервью алганы барган жеринен жагымсыз окуяга кабылганын ырастоодо.

Ал 2007-жылы бир жогорку кызматкер аны зордуктоого аракеттенгенин телеберүүдө айтып, бирок атын атаган эмес.

Банондун сотко кайрылуу чечимин анын адвокаты Давид Кубби бышыктады:

- Тристан Банон мага берген тапшырма айдан ачык. Зордуктоо аракетине байланыштуу Доминик Стросс-Кан мырзага каршы иш козгоо арызын беребиз. Ал окуя 2003-жылы болгон жана мындай кылмыштарга мүнөздүү чектен чыккан зомбулук менен коштолгон.

Адвокат: "Нью-Йорктогу иштен айырмаланып, биздин далилдерибиз күчтүү", - деди.

Ал кезде стажер болуп иштеп жүргөн жаш журналисттин айтымында, Стросс-Кан Париждеги батиринде анын ички кийимин тытып ыргытып, шымын чечүүгө аракеттенген. 4-июлда “Экспресс” гезитине курган маегинде Банон агрессорун тээп, эптеп бошонуп качканын айтып берди.

Ал ошондо жаштык кылып, энесинин тилин укканын айтат. Журналисттин энеси – Анн Мансуре (Стросс-Кандын социалисттик партия боюнча жакшы таанышы) кызын сотко арыз берүүдөн айнытып койгонуна азыр өкүнөт.

Стросс-Кандын айланасындагы окуялар кайрадан франциялык гезиттердин башкы бетине чыкты.

Франциянын мыйзамдарына ылайык, зордуктоо аракети боюнча арыз менен окуя болгондон 10 жыл өткүчө кайрылса болот. Банон Стросс-Кан Нью-Йоркто кармалган 14-майда эле сотко арыз берээрин билдирген. Анын күнөөсү далилденсе, саясатчы 15 жылга чейин эркинен ажыратылышы ыктымал.

Стросс-Кандын адвокаттары жооп иретинде журналистти жалаа жабуу үчүн сотко беришээрин ырасташты.

Нью-Йорктогу сот экс-төраганы үй камагынан бошотуп, айыптап жаткандардын туруму солгундай түшкөндө Стросс-Кан чоң саясатка кайтат экен деген имиштер айтыла баштаган.

Сотко чейин ал социалисттердин атынан президенттикке көрсөтүлө турган күчтүү талапкер болот деп күтүлгөн эле. Сурамжылоолор Стросс-Кан президент Николя Саркозини жеңиши мүмкүн деп көргөзүп келген.

Бирок партиянын маалымат катчысы Бенуа Амон 4-июлда билиргендей, Стросс-Кандын эмки жылы президенттикке ат салышаары өтө күмөн. “Ипсос” борбору өткөргөн сурамжылоого ишенсек, катардагы француздардын 51 пайызы анын саясий келечеги жок эсептешет.

XS
SM
MD
LG