Мунай ташуунун негизги жолу болгон Ормуз кысыгында кеме кыймылы токтогону айтылды
Ирандын Ислам революциясынын сакчылар корпусуна караштуу Tasnim маалымат агенттиги өз булактарына таянып мунай ташуунун негизги жолу болгон Ормуз кысыгы жабылганын билдирди. Бул тууралуу Би-би-си жазды.
Улуу Британиянын деңиз соода уюму да бир нече кеме кысык аркылуу өтүүнү токтотуу жөнүндө эскертүү алганын билдирди.
Тегеран кемелердин токтогонун расмий түрдө жарыялай элек.
Спутниктен алынган сүрөттөр көрсөткөндөй, кемелердин көбү Ормуз кысыгына эмес, аймактагы ири порттордун жанында (мисалы, Бириккен Араб Эмирликтериндеги Фужайра) топтолууда. Бул тууралуу Reuters жазды.
Ормуз кысыгы дүйнөдөгү мунай жана газдын болжол менен 20% ташылып өтүүчү эң маанилүү деңиз соода жолдорунун бири деп эсептелет.
"Эркин Европа/Азаттык" радиосунун ирандык кызматы («Фарда» радиосу) борбор калаа Тегеранда жана Караж, Гармдарре шаарларында 28-февралдын кечинде да жарылуулар болгону тууралуу маалыматтарды алганын билдирди.
Ирандын маалымат агенттиктери кабарлагандай, Тегеранда катуу жарылуу болгону угулду.
Көз каранды эмес маалымат булактары ушундай эле жарылуу Ирандын башка шаарларында да болуп жатканын кабарлашты.
Иранда жекшемби күнү таңга маал мамлекеттик жалпыга маалымдоо каражаттары (ЖМК) өлкөнүн Жогорку руханий лидери аятолла Али Хаменеи өлтүрүлгөнүн жазып чыгышты.
Мунун алдында, 28-февралда АКШнын президенти Дональд Трамп өзүнүн Truth Social соцтармагы аркылуу Хаменеи америка-израил биргелешкен операциясы маалында жок кылынганын маалымдаган. Ошондой эле муну “адилеттиктик” катары сыпаттаган.
"Дүйнөдөгү эң карөзгөй адамдардын бири мерт болду. Бул Ирандын эли үчүн гана эмес, Хаменеи жана анын канкор корбашылары өлтүргөн, майып кылган мыкты америкалыктар, дагы далай өлкөлөрдүн жарандары үчүн адилеттик", - деп жазган Трамп.
28-февралдын кечинде бир катар эл аралык маалымат каражаттары, анын ичинде Reuters Израилдин жетекчилигиндеги булактарына таянып, Али Хаменеи ушул эле күнү жасалган аба чабуулдардан жан таслим болгонун билдиришкен.
Ишембиде Али Хаменеинин жардамчысы Али Ларижани Х соцтармагындагы баракчасына өч алуу болорун билдирген жана бул аятолла жан таслим болгону кыйыр түрдө аныкталганы катары кабыл алынган.
“Биз сионисттик кылмышкерлерди жана уятсыз америкалыктарды кылган кылыгы үчүн өкүндүрөбүз. Ирандын эр жүрөк жоокерлери жана улуу эли эл аралык зордукчуларга эстен кеткис сабак берет”, - деп жазган Ларижани.
Али Хаменеи 1989-жылы Ислам Республикасынын негиздөөчүсү, аятолла Рухолла Хомейни каза болгондон кийин жогорку лидерликке келип, ошондон бери Иранда дээрлик чексиз бийликке ээ болуп келген.
Израил менен АКШ биргелешкен аба соккуларын 28-февралда Иранга жасаган. Тегеран жооп кайтарып, АКШнын аскердик техника, кеме-учактары жайгашкан Бириккен Араб Эмирликтерин, Катар, Кувейт, Израил жана башка мамлекеттерди бутага алган.
Шерине