Иерусалимден анча алыс эмес жайгашкан Бейт-Шемеш шаарында көп кабаттуу турак жайга тийген ракетадан өлгөндөрдүн саны тогуз кишиге жетти. Ирандын аба соккуларынын көбүн Израил асманда токтотуп жатканы менен, жашоочуларга бардык чабуулдардын жолун тосуу мүмкүн эмес экени эскертилген.
Бейт-Шемештеги соккудан дагы 30дай киши жараат алганын, алардын экөөнүн абалы оор экенин израилдик куткаруучулар кабарлашты.
Жекшембиде Ирандын аба соккулары Катар, Бахрейндин баш калаалары Доха, Манаманы, Бириккен Араб Эмираттарынын ири шаары Дубайдагы айрым жайларды бутага алды.
Иранга каршы "Эпикалык каардануу" операциясында үч аскери набыт болуп, дагы бешөө жараат алганын АКШнын Куралдуу күчтөрүнүн борбордук командачылыгы билдирди. Жеңил жараат алган бир нече аскер операцияга кайра кошулуу алдындагы медициналык кароодон өтүп жатат.
Ирандын IRIB маалымат агенттиги Ормуз кысыгы аркылуу өтүүгө аракеттенген мунай танкери чөгүп баратканын кабарлады. Skylight деп аталган танкер Палаунун желеги астында Ирактын Басра шаарындагы порттон Оманды көздөй баратып, бул өлкөнүн жээгине жакын жерде чөгө баштаган. Рейтер агенттиги Ормуз кысыгы аркылуу каттаган 150дөй мунай танкери ушу тапта Иран, Ирак, Кувейт, Бириккен Араб Эмираттары, Омандын жээктерине жакын жерлерде жылбай токтоп калганын маалымдады. Эксперттер дүйнөдөгү кара майдын бештен бири ташылган кысыктын кооптуу абалда калышы мунайдын баасына терс таасир этет деп эскертүүдө.
АКШ президенти Дональд Трамп Ирандын жаңы бийликтери сүйлөшүү ниетин билдиргенин, өзү да диалогго даяр экенин билдирди. "Алар сүйлөшүү ниетин билдиришти, ошондуктан мен алар менен сүйлөшөм. Мурдараак ошентишсе болмок. Эртерээк эле ыңгайлуу жана жеңил жагын эске алып сунуш кылышса болмок. Өтө узакка созулуп кетти", - деди Трамп The Atlantic басылмасына берген интервьюсунда. Ал сүйлөшүү качан болушу мүмкүн деген суроого жооп берген жок.
Ал тапта израилдик Ynet басылмасы америкалык жетекчилердин бирине шилтеме берип, Тегеран АКШнын ок атууну токтотуу сунушун четке какты деп жазды. Андагы маалыматта Вашингтон ортомчулар аркылуу Тегеранга атайын операциянын эртеси ок атууну токтотууну сунуштаганы айтылат. Иран андай сунушка көнгөн эмес.
АКШ менен Израилдин Иранга каршы биргелешкен согуштук операциясы 28-февралда башталган. Иран ага жооп катары Израилди эле эмес, чөлкөмдөгү бир катар өлкөлөрдүн аймактарына абадан чабуул койду.
Бириккен Араб Эмираттарынын Коргоо министрлиги Ирандын учкучсуз истребителдери Абу-Дабидеги француз аскер-деңиз базасын бутага алганын билдирди. Ирандын ракеталары Араб деңизиндеги америкалык согуштук кемеге сокку урду. Пентагон бул чабуул максатына жеткен жок деп билдирди.
Бириккен Араб Эмираттары (БАЭ) эки күн ичинде ирандык 167 ракета асманда жок кылынганын, 35 дрон турак жайларга тийип, үч чет элдик жаран каза тапканын маалымдады. 58 киши ар түркүн жараат алышкан. БАЭ өлкөнүн эгемендигин, улуттук коопсуздукту камсыздоо максатында тийиштүү чаралар көрүлүп жатканын кошумчалады.
Тышкы иштер министрлиги Бириккен Араб Эмираттарында жүргөн кыргызстандыктарга коопсуздук чараларын күчөтүп, соңку окуялар боюнча жергиликтүү бийликтин расмий билдирүүлөрүнө жана такталган маалыматтарга гана ишенүүгө чакырды. Мекеменин мындай билдирүүсү 2-мартта жарыяланды.
Анда министрлик БАЭнин тиешелүү мекемелери ал жакта жүргөн жарандарды мейманканаларда акы төлөбөстөн убактылуу жашап туруу чечими кабыл алынганын жана аба каттамдары жылдырылып же жокко чыгарылганына байланыштуу мейманканалар туристтерди чыгарбоо милдетин алганын маалымдады.
ТИМ буга байланыштуу жарандарды буга чейин жашаган мейманканада болуп турууга, бийлик органдарынын расмий сунуштарын күтүүгө, Кыргызстандын дипломатиялык мекемелери, авиакомпаниялар жана мейманкананы администрациясы менен байланышта болуп турууга чакырды.
“Эгерде абадан коргонуу сигналы же башка өзгөчө кырдаалдар жарыяланса, укук коргоо органдарынын кызматкерлеринин жана мейманкана кызматкерлеринин көрсөтмөлөрүн так аткаруу зарыл. БАЭде "жабык асман" режими киргизилгендиктен, жер менен үчүнчү өлкөлөр аркылуу чыгуу жолдорун өтө зарыл учурда гана кароону жана компетенттүү органдардын расмий маалыматын милдеттүү түрдө көзөмөлдөөнү суранабыз”, - деп жазылган билдирүүдө.
Мекеме БАЭде жүргөн мекендештерди өзү тууралуу маалыматтарды – аты-жөнүн, туулган күнүн, паспорт номурун, ал жакта жашаган дарегин жана байланыш номурларын жөнөтүүгө чакырды.
- Кыргызстандын БАЭдеги элчилиги: +971522255269;
- Кыргызстандын Дубай шаарындагы башкы консулдугу: +971522918840;
- Тышкы иштер министрлигинин Консулдук департаменти: +996999312002.
Шерине