1-сентябрда Бишкек - Ош автожолунда жол кырсыгынан алты адам мүрт кетти. Бул тууралуу “Азаттыкка” Ички иштер министрлигинин (ИИМ) Жол кыймылынын коопсуздугун камсыздоо башкы башкармалыгы (ЖКККБ) билдирди.
Маалыматка караганда, кырсык Токтогул районунда болгон. KIA K5 үлгүсүндөгү автоунаа машинелерди озуп өтүү учурунда оор жүк ташыган унаа менен сүзүшүп, KIA K5тин ичиндеги алты киши мүрт кеткен. Жүк ташыган машине Toyota Land Cruiser унаасы менен да кагышкан.
Кыргызстанда акыркы жылдары жол кырсыктары көп катталууда. Расмий маалымат боюнча, 2025-жылы өлкөдө 8 456 жол кырсыгы болуп, андан 900 киши каза тапкан. Дагы 12 миң 169 адам ар кандай жаракат алган.
Кырсыктарга автоунааны катуу айдоо, каршы тилкеге чыгуу, ичимдик ичип рулга отуруу жана айрым автожолдордун талапка жооп бербегени негизги себеп экени айтылып келет. (BTo)