Түркмөнстанда мурда чет мамлекеттен билим алган жаштардын өлкөдөн чыгуусуна тыюу салуу фактылары көбөйдү. Лебап провинциясынын бир нече тургуну “Азаттыктын” түркмөн кызматына өлкөдөн чыгууга тыюу салынганын аэропорттон гана билишкенин айтышты.
Журналисттер менен байланышка чыккандардын бири 30-августта Ашхабаддан Түркияга учууну пландап жаткан. Паспорттук текшерүүдөн өткөндө ага Түркмөнстандан чыгууга тыюу салынган жарандардын тизмесинде экени айтылган.
Ал буга чейин Түркияда билим алган, бирок анын университети түркмөн банктары аркылуу окуу акысын төлөөгө уруксат берилген чет элдик университеттердин тизмесинен чыгарылып калгандыктан окуусун токтотууга аргасыз болгон. Ал чет өлкөдө окуп келип, кийин Түркмөнстандан чыгуусуна тыюу салынган Лебап облусунун дагы башка бир нече тургунун билерин кошумчалады. Эмне себептен тыюу салынганы алардын эч бирине түшүндүрүлгөн эмес.
Аймактык бийликтеги өз булактары “Азаттыктын” түркмөн кызматына чет өлкөдө окуп келген жаштарды бир жылга өлкөдөн чыгууга тыюу салынган адамдардын тизмесине киргизип жатканын билдиришти. Булактар мунун себебин түшүндүрүшкөн жок жана кошумча комментарий берүүдөн баш тартышты.
“Азаттыктын” түркмөн кызматы өлкөнүн Миграция кызматынан расмий маалымат ала алган жок. Мекеменин сайтында мындай чектөөлөр тууралуу маалымат жарыяланган эмес.
Түркмөнстандын “Миграция жөнүндө” мыйзамынын 30-беренесинде жарандардын өлкөдөн чыгуу укугу убактылуу чектелиши мүмкүн болгон учурлар каралган. Бирок чет өлкөлүк университетте окууну токтотуу же андан чыгарылуу мындай негиздердин арасында ачык көрсөтүлгөн эмес.
Өлкөдөн чыгууга байланыштуу чектөөлөр студенттерге гана тиешелүү эмес. Буга чейин Түркмөнстандын Куралдуу күчтөрүнүн кеминде үч мурдагы аскерине да өлкөдөн чыгууга тыюу салынганы кабарланган.