Кыргызстанда 2026-жылдын январь-июль айларында жол кырсыгынан 464 адам каза болду. Бул тууралуу Улуттук статистикалык комитетинин баяндамасында айтылат. Аймактарга бөлүп караганда Чүй облусунда 99, Ош облусунда 75, Ысык-Көлдө 70 киши жол кырсыгынан каза тапкан. Калган облустарда 10-60 адамдан курмандыктар бар.
Соңку жылдары өлкөдө жол кырсыктары көп катталууда. 16-сентябрда эле Бишкек-Ош автожолунун 167-чакырымында алты адам мүрт кетип, дагы үч киши жаракат алган. 1-сентябрда ошол эле Бишкек-Ош автожолунда алты адамдын өмүрү кыйылган.
Расмий маалымат боюнча, 2025-жылы өлкөдө 8 456 жол кырсыгы болуп, андан 900 киши каза тапкан. Дагы 12 миң 169 адам ар кандай жаракат алган.
Кырсыктарга автоунааны катуу айдоо, каршы тилкеге чыгуу, ичимдик ичип рулга отуруу жана айрым автожолдордун талапка жооп бербегени негизги себеп экени айтылып келет. (BTo)