Шейшемби күнү кечке жуук башталган жамгырдын аягы карга айланып, натыйжада область боюнча ондогон айыл-кыштактар жарыксыз калды. Кечки саат алтыда Талас районундагы Арашан айылынын үстүндө жайгашкан №16 ретранслятордук станцияда да жарык өчүп, кыргыз радиосунун биринчи жана экинчи каналдары аркылуу уктурулуучу программалары элге жеткен жок. КТР, РТР жана ОРТнын телепрограммалары саатына отуз литр солярка керектелүүчү авариялык кыймылдаткычтардын энергиясы аркылуу көрсөтүлүп жатат. Телемунарада болсо 150 литр гана күйүүчү май топтолгон.
Аба ырайынын кескин өзгөрүшү Таластагы калкты электр энергиясы менен камсыз кылууга кесепетин тийгизди.
