БИШКЕК. Бүгүн Дүйшөмбү шаарында КМШ мамлекеттеринин Тышкы иштер министрлеринин жыйыны башталды. Ага Кыргызстандын тышкы иштер министри Аскар Айтматов катышууда. КМШ министрлери Дүйшөмбүдө Ирак маселесин Бириккен Улуттар Уюмунун алкагында чечүүнү камсыздоо жана антитеррордук, антикриминалдык багытта кызматташуу маселелерине өзгөчө көңүл бурушмакчы. Министрлер 2003-2004-жылдары эл аралык терроризм жана экстремизмге каршы биргелешип күрөшүү боюнча эксперттер иштеп чыккан программанын долбоорун талкууга алышат.
