Орусиянын мунай ташуучу кемеси өрттөнүп кетти

Орусиянын Самарск областында ишембиден бери күйүп жаткан мунай ташуучу танкердеги өрт бүгүн өчүрүлдү. Өрттөн бир матрос каза болуп, эки өрт өчүргүч катуу жарат алышты. Тюмендеги отун-мунай кампаниясына таандык танкер Волга дарыясы менен 2 миң тонна мунай тартып келатып, өрткө кабылган. Өрттөн чыккан майлуу ыш шаардын үстүн каптап, Волга дарыясынын бир чарчы чакырымдан ашык аянтын мунай жаап калды. Эколог-адистер мындай жагдай экологиялык алааматты жаратат деп кооптонуп жатышат.