БИШКЕК. Быйылкы кыштан чыгыш үчүн Бишкек ТЭЦине зарыл болгон 591 миң тонна көмүрдүн азыр 56% гана топтолду. Мындай маалымат премьер-министр Николай Танаевдин төрагалыгы менен кечээ кечинде өткөрүлгөн селектордук кеңешмеде айтылды. Маалыматка караганда, бюджеттик бир дагы мекеме кышка даяр эмес. Маселен, Ички иштер министрлигине зарыл отундун азыр 6,2% гана бар. Коргоо министрлиги зарыл отундун 15%, Билим берүү жана маданият министрлиги 83%, Саламаттык сактоо министрлиги 69% камдашты. Бишкек ТЭЦи жагып жаткан газдын көлөмү азыр саатына 31 миң куб метр болууда. Борборду жылуулук менен толук камсыз кылыш үчүн эки агрегат ишке киргизилсе, саатына дагы 5 миң куб метр газ керек болот. Бирок газ боюнча Кыргызстандын Өзбекстанга карызы 12 млн. долларга чамалап калгандыктан, кыш айларында элди газ менен камсыз кылуу маселеси курчушу мүмкүн.
