БИШКЕК. Кыргызстандын алыскы айылдарынын калкын сапаттуу дары-дармек менен камсыз кылуу долбоору ишке кирди. Мындай маалыматты бүгүн Саламаттык сактоо министрлигинин басма сөз кызматы таратты. Долбоорду Саламаттык сактоо министрлигинин медициналык милдеттүү камсыздандыруу фонду, саламаттык сактоо тармагын реформалоого колдоо көрсөтүү боюнча кыргыз-швейцар долбоору жана кардарлардын укугун коргоо боюнча «Максат» аттуу коомдук бирикмеси ишке ашыра баштады. Долбоор аптеканын жоктугунан сапаттуу дары-дармектен куржалак калган айыл тургундарынын муктаждыгын канаттандыруу максатын көздөйт. Долбоордун алкагында азыр алыскы айылдарда турган адистер атайын даярдыктан өткөрүлө баштады.
