БИШКЕК. Жогорку Кеңеш Кемин округунан шайланган Айдар Акаевди кылмыш жообуна тартууга уруксат берүү жөнүндө Баш прокуратуранын өтүнүчүн иликтөө боюнча атайын комиссия түздү. Анын катарына 9 депутат кирип, төрагалыгына депутат Исхак Масалиев шайланды. Башкы прокурор Азимбек Бекназаров Айдар Акаевге төрт кылмыш иши козголуп жатканын айтып, 23-июнда парламенттен аны кол тийбестигинен ажыратууну суранган. Айдар Акаевдин кылмыш иштерин иликтөө үчүн бул комиссияга 15 күн мөөнөт берилди. Экс-президенттин үй-бүлө мүчөлөрүн коргоп жаткан адвокат Максим Максимович журналисттерге “комиссия түзүлгөндүгү бизди чочутпайт”, деп билдирди. Анын айтымында, ал Айдар Акаевдин адвокаты катары комиссия менен иштешет жана иликтөөгө зарыл материалдарды берип турмакчы.
