БИШКЕК. Кыргыз-өзбек чек арасын аныктоо боюнча эки тараптуу эксперттик жумушчу топтун быйылкы жылдагы алгачкы сүйлөшүүсү 13-февралда Жалалабат облусунда башталды. Сүйлөшүү ушул жуманын соңуна дейре созулмакчы. Бул тууралуу «Азаттыкка» кыргыз өкмөтүнүн алдындагы регионалдык маселелер боюнча бөлүмдүн башчысы Саламат Аламанов шейшембиде билдирди. Буга чейин өкмөттөр аралык комиссиянын иши чек ара тилкесинин татаал маселелери бар бөлүктөрүнө жеткени айтылган. Жалпысынан кыргыз-өзбек чек арасында эки тарап бир пикирге келе албай жаткан 50 чакты аймак бар.
