БИШКЕК. Кыргызстандын Россиядагы элчилигинин вице-консулу Алмаз Имангазиев учурда Санкт-Петербургдагы окуянын чоо жайын иликтөөдө. Бул тууралуу Тышкы иштер министрлигинин маалымат кызматынан 27-февралда “Азаттыкка” билдиришти. Маалыматка караганда 24-февралда кечки саат тогуздар чамасында Санкт-Петербургда соода кылып жан багып жүрүшкөн Кыргызстандык эки аялды белгисиз адамдар бычактап кетишкен. Алардын бирөөсү окуя болгон жерде каза болуп, бирөөсү оор жаракат алып ооруканага жеткирилген. Буга байланыштуу Санкт-Петербург шаардык прокуратурасы тарабынан кылмыш иши козголуп иликтөө иштери жүргүзүлүүдө.
