«Асаба» партиясынын лидери Азимбек Бекназаров «Азаттыкка» берген маегинде курултай алдына койгон максатына жеткенин билдирди. «Акаевчылар кетсин!» деген ураан астында өткөн бул курултайга мамлекеттик катчы Адахан Мадумаров, коопсуздук кеңешинин катчысы Мирослав Ниязов, Жогорку Кеңештин айрым депутаттары жана бир катар партиялардын, бейөкмөт уюмдардын өкүлдөрү, укук коргоочулар катышты. Курултайга келген элдин саны 2 миңден ашты. Уюштуруучулар болсо башында катышуучулардын саны 10 миңден 15 миңге чейин жетерин болжоп жатышканын айтышкан.
