Ливиянын расмий адамдары НАТОнун аба соккусунан карапайым 15 киши, анын ичинде 3 бала өлгөнүн ырастоодо. Альянс анын учактары Сорман деген жерге сокку урушканын моюнга алып, бирок бутага аскерий объект алынганын билдирди. Кабарчыларга шаардын четинде Каддафинин жакын шериктеринин бирине таандык адамдын талкаланган турак-жайын, ооруканадагы сөөктөрдү көрсөтүштү. АФП агенттигинин кабарчысы 9 кишинин сөөгүн көргөнүн айтты. Кечээ эле НАТО техникалык себептерден улам, Триполинин жака белинде жайкын тургундар арасында жоготуулардын ыктымалдыгын моюнга алган. Анда Ливия өкмөтү 9 киши набыт кеткенин айткан.
