АКШнын мамлекеттик катчысы Хиллари Клинтон “Сириянын достору” аттуу конференцияга катышуу үчүн Туниске барды. Ал жыйында сүйлөгөн сөзүндө үч маселеге көңүл бурду: Сирияда башаламандык болуп жаткан аймактын жашоочуларына гуманитардык жардам көрсөтүү, президент Башар Асадга оппозициянын тарапкерлерине кыргынды токтотуу боюнча кысым көрсөтүү жана Сирияда демократияны калыптандыруу. Конференцияга 70тей Батыш жана Араб өлкөлөрүнүн расмий өкүлдөрү чогулду. Анын ичинде Америка, Британия, Франция, Түркия мамлекеттери бар, ал эми Орусия жана Кытай жыйынга катышуудан баш тартты.
