Башкалаа Санаада бүгүн өткөн салтанатта Абдулла Салех расмий түрдө бийлигин вице-президент Абдрабух Мансур Хадиге өткөрүп берди. Хади өткөн жумадагы шайлоодо жалгыз талапкер катары жеңген. 30 жылдан ашуун Йеменди башкарып турган Салех өлкөдө бир жылдай созулган элдик толкундоолор, кагылышуу жана АКШ менен Араб өлкөлөрүнүн кысымы астында бийликтен кетүүгө аргасыз болуп отурат жана ал соңку бир жыл ичинде тактыдан кеткен төртүнчү араб лидери болуп калды.
