Нурлан Мотуев эртеңки акция үчүн суракка чакырылганын айтууда

Бул тууралуу “Жоомарт” кыймылынын лидери Нурлан Мотуев өзү “Азаттыкка” билдирди. Анын айтымында, алгач Бишкек ИИБнын кызматкерлери келип, эртең болуучу нааразылык акциясын өткөрбөө тууралуу эскертүү берип кеткен:

- Андан кийин өздөрүн ИИМдин 10-бөлүмүнүн кызматкерлери деп тааныштырган милиционерлер мени Ички иштер министрлигине алып келишти. Азыр ошол жерде отурам.

Нурлан Мотуев мусулмандардын нааразылыгын жараткан “Бейкүнөө мусулмандар” тасмасына нааразылык билдирүү үчүн 21-сентябрда Кыргызстандагы АКШ элчилигинин алдына акция уюштурмакчы болуп жаткан. Мотуев акция тынч маанайда, эч кандай агрессиясы жок мүнөздө болорун белгиледи.

ИИМдин 10-бөлүмүнүн башчысы Таалайбек Акбаев “Жоомарт” кыймылынын лидеринин сөзүн четке кагып, кармоо болбогонун “Азаттыкка” билдирди. (ZKo)