“Ата Журттун" үч депутатынын иши сотко өтөт

2012-жылдын 3-октябрынан бери тергөө абагында отурган Жогорку Кеңештин депутаттары Камчыбек Ташиевге, Талант Мамытовго жана Садыр Жапаровго байланышкан кылмыш иши бүгүн сотко өткөрүлүп берилет. Бул тууралуу Башкы прокуратуранын басма сөз кызматы маалымдады.

3-октябрда нааразылык митинги өтүп, анын катышуучуларынын Ак үйдү курчап турган тосмодон ашып кирүүгө жасаган аракетин милиция токтоткон. “Ата Журт” фракциясынын үч мүчөсү: Камчы Ташиевге, Садыр Жапаровго жана Талант Мамытовго "бийликти күч менен басып алууга чакырык жасаган" деген айып тагылып, камакка алынышкан. (ZKo)