Филолог, түрколог Кусейин Карасаевдин жубайы Айша Карасаеванын дүйнө салганы тууралуу КТРКнын башкы директорунун радиоуктуруулар боюнча орун басары Кайрат Иманалиев билдирди. Маркумду акыркы сапарга узатуу зыйнаты эртең 11-сентябрда түшкү саат бирде Каракол шаарындагы Касымалы Жантөшев атындагы драма театрда өтөт.
Айша Карасаева 1927-жылы «Жабык араба» фильминде башкы ролду жараткан кыргыз киносунун тарыхындагы биринчи аял. Бул кинодо А.Карасаева Айжамалдын ролун ойногон.
Мындан тышкары ал 1960-жылы жарык көргөн стенография боюнча китептин автору болуп саналат. Жусуп Баласагын атындагы Улуттук университетте кыргыз тилинин стенографиясы боюнча сабак берген. 1930-жылы Кусейин Карасаев менен баш кошуп, 70 жыл чогуу өмүр сүрүшкөн. Ал Кусейин Карасаевдин бардык илимий эмгектеринин редактору болгон. Айша Карасаева 1912-жылдын 8-мартында жарык дүйнөгө келген. (AzK)
