Сербиянын тез жардам тик учагы 5 күндүк наристени ооруканага алып бараткан учурда кулап тушту. Окуя 13-март күнү болгонун жергиликтүү маалымат булактары кабарлады. “Ми-17” үлгүсүндөгү тик учак Белграддын жанындагы аба майданына жакын жерде коюу тумандын айынан кырсыкка кабылган.
Тик учактагы жети кишинин баары – экипаждын төрт мүчөсү, эки медайым жана наристе курман болушту. Премьер-министр Александр Вуцик чукул жыйын өткөрүп, 15-мартты Сербияда аза күтүү күнү деп жарыялады. Өкмөт башчынын жыйыны мамлекеттик телеканалдан түз көрсөтүлдү.
