Бул тууралуу Ош облустук администрациясынын басма сөз катчысы Жумамидин Сулайманкулов “Азаттыкка” билдирди:
- Бул үй-бүлө мурдатан эле каттоого алынган. Бирок энеси туруктуу жашаган жери жок болгондуктан, дайын-дарегин таптырбай, социалдык өнүктүрүү башкармалыгынын кызматкерлери менен жолугуудан качат экен. Учурда бул үй-бүлөгө кийим-кече, тамак-аш жагынан жардам берилди. Эми балдарды бакчага жайгаштыруунун жана энесинин өзүнө туруктуу жумуш таап берүүнүн үстүндө иштеп жатабыз. Белгилей кетүүчү нерсе, балдардын да, энесинин да тек-жайын тастыктаган документтери жок экен.
Сулайманкулов билдиргендей, баланын аты Исхак, жашы үчтө, анын дагы үч бир тууганы бар, энеси болсо жалгыз бой. Бул үй-бүлө Кара-Суу райондук социалдык өнүктүрүү башкармалыгында каттоодо турат.
Картон кагазда уктап жаткан 2-3 жаштагы баланын сүрөтү интернетте катуу талкууга алынып, 17-сентябрда президент Алмазбек Атамбаев анын тек-жайын аныктоону жана тиешелүү жардам берүүнү өкмөткө тапшырган.(ZKo)
