Бул тууралуу Борбордук шайлоо комиссиясынын төрайымы Нуржан Шайлдабекова маалымат жыйынында билдирди. Анын айтуусунда, референдумга жалпы шайлоочулардын 394 миңи добуш берген. Активдүүлүгү жагынан Нарын облусу алдыда. Ааталган облуста шайлоочулардын 17,68% катышса, 16% менен Талас келе жатат. Ысык-Көлдө болсо 15,53% шайлоочу добуш берди. Ал эми Чүй облусунда 14,85%, Баткен облусунда 13%, Жалал-Абадда 12,74%, Ош облусу 11,35% шайлоочу катышты.
Бишкек шаарында шайлоочулардын 14,91%, ал эми Ош шаарында 14,25% добуш берди.
Ал эми жергиликтүү кеңештерге жалпы 317 942 киши добуш берген, бул бардык шайлоочулардын 14,58% түзөт. БШК төрайымынын айтуусунда, жергиликтүү кеңештерге шайлоо активдүү жүрүп жатат. Активдүүлүгү жагынан Нарын облусу 17,37%, Ысык-Көл облусу 16,87%, Талас облусу 15,81% менен алдыда. Ал эми Чүй облусунда шайлоочулардын 15,58%, Жалал-Абадда 12,65%, Баткенде 12,42%, Ош облусунда 11,77% катышты.
Айылдык кеңештерге шайлоого 232 292 шайлоочу добуш берди, бул жалпы шайлоочулардын 13,66% түзөт.
2015-жылдагы парламенттик шайлоого салыштырганда, быйыл шайлоочулардын катышуусу эки эсе төмөн болууда. Былтыр 4-октябрда саат 14.00гө карата жалпы шайлоочулардын 30 пайызы добуш берген. (EB/ZKo)