Президенттин иш башкармалыгынын башчысы Турусбек Коёналиев мамлекеттик резиденциядагы президентке караштуу бөлмөлөрдүн бошотулбай жатканы боюнча жергиликтүү интернет-сайттар жарыялаган маалыматты четке какты.
Анын “Азаттык” радиосуна билдиргени боюнча, экс-президент башка дачага көчүрүлгөн жана жаңы президент Сооронбай Жээнбеков иштей турган, жашай турган турак жай ремонттон өткөрүлдү.
- Жаңы президенттин иш кеңсеси, жашай турган турак жайы - баары даяр. Буга чейин эми ал үйдө кичинекей ремонт иштери жүргүзүлдү. Негизинен бардыгы жакшы эле жашап жатышат. Президент эки иш кеңсесинде тең иштеп жатат.
Айрым интернет-басылмалар 24-ноябрда президентик кызматка расмий киришкен Сооронбай Жээнбеков резиденциядагы премьер-министр кезиндеги үйдө жашап жатканын жазышкан. Анда экс-президент Алмазбек Атамбаев “Ала-Арча” мамлекеттик резиденциясындагы президенттик үйдү жана андагы президенттин иш кабинетин бошотуп бере электиги айтылган. (КЕ/KJ)
