Линктер

ЧУКУЛ КАБАР!
4-Август, 2021 шаршемби, Бишкек убактысы 23:03

«Кылым шамы»: Ала качууга туш болгон кыз психологдун жардамына муктаж


Иллюстрациялык сүрөт.

Кыргызстанда 7-августта кыз ала качуу фактысы байкалды. «Кылым шамы» укук коргоо уюмунун жетекчиси Азиза Абдирасулова «Азаттыкка» билдиргендей, кызды Бишкектен Ысык-Көлдүн Түп районуна ала качып барышкан.

Бишкек шаардык ички иштер башкармалыгы, Түп жана Караколдун милиция кызматкерлери ала качууга кабылган кызды бекитип жаткан жерден таап, баш калаага алып келишти.

Маалыматка караганда, кызды ала качкан жигит андан 16 жаш улуу, мурда үч жолу үйлөнгөн жана балдары бар экени белгилүү болду. Ал эми жабырлануучу аны менен мурда жолугуп сүйлөшкөн эмес.

Азыр ала качууга катышы бар төрт адам милицияда сурак берип жатат. Абдирасулова шектүүлөрдүн туугандары Бишкекте милиция имаратынын алдына чогулуп, жабыркаган тарапты тосмо арыз жаздырууга аракеттенип жатканын, кечирим сурап кыздын үйүнө да барып алышканын кошумчалады. Укук коргоочу ала качууга кабылган кыз психологдун жардамына муктаж экенин айтты.

Шектүү тарап окуя тууралуу комментарий бере элек.

Кыргызстанда 2013-жылкы мыйзамга ылайык, кыз ала качкан адам 5-7 жылга эркинен ажыратылат. Укук коргоочулар бул маселе дагы эле көйгөйлүү экенин белгилешүүдө. Жаңы түзүлгөн үй-бүлөлөрдүн 20% ала качуунун негизинде куралган өлкөдө анын курмандыгы болгон кыздардын милицияга кайрылышы өтө сейрек кездешет. (NT)

Пикирлерди көрүңүз (3)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG