«Орусия - Кыргызстандын стратегиялык өнөктөшү жана союздашы». Мындай пикирин президент Сооронбай Жээнбеков 26-сентябрда «Биринчи радиодогу» маегинде билдирди. Мамлекет башчы Кыргызстан Орусия менен кызматташтыкка чоң маани берерин белгилеп, тараптардын учурдагы мамилеси эң жогорку деңгээлде экенин айтты.
Кыргызстандын президенти Сооронбай Жээнбеков бүгүн, 28-сентябрда Орусияга жумушчу сапар менен барып, Орусиянын президенти Владимир Путин менен жолугушат. Ушул эле күнү Кыргызстандын президенти Венгрияга расмий сапар алат. Венгрияда өтчү сапары эки күнгө эсептелген.
25-сентябрда Жээнбеков тышкы иштер министри Чыңгыз Айдарбеков менен онлайн кеңешме өткөрүп, алдыдагы сапарларды талкуулаган. Венгрияда ал премьер-министр Виктор Орбан, президент Янош Адер жана Улуттук Жыйындын спикери Ласло Кёвер менен жолугуп, эки тараптуу сүйлөшүүлөрдү өткөрөт.
Венгриянын премьер-министри Виктор Орбан 2018-жылы сентябрда Кыргызстанга расмий сапар менен келген. (ZKo)
