Линктер

ЧУКУЛ КАБАР!
28-ноябрь, 2020 ишемби, Бишкек убактысы 20:00

Европанын айрым өлкөлөрү карантинди жумшартканы жатат


Иллюстрациялык сүрөт.

Европанын айрым өлкөлөрү коронавирустун экинчи толкунуна байланыштуу бир нече апта мурда күчөтүлгөн чектөөлөрдү жумшартканы жатат. Франция президенти Эммануэл Макрон келе жаткан жумада элге кайрылып, 30-октябрда киргизилген улуттук карантинди жарым-жартылай жумшарта турганы кабарланды. 21-ноябрда француз премьер-министри Жан Кастекс чектөөлөрдүн бир бөлүгү саналуу күндөн кийин алына турганын ишарат кылган.

Британиянын премьер-министри Борис Жонсондун кеңсеси Англияда карантин 2-декабрда алынарын, чектөөлөр коронавирустун очокторунда гана киргизиле турганын билдирди. Польшанын өкмөтү 28-ноябрда дүкөндөрдү кайра ачууну пландап жатат. Бирок кинотеатрлар, ресторандар жабык болот жана мектептер аралыктан билим берүүнү уланта берет. Польшанын премьер-министри Матеуш Моравецкий жарандарды "Рождество" майрамы учурунда саякатка чыкпоого үндөдү.

Европанын экономикасы өнүккөн өлкөсү - Германияда да карантин ушул айдын аягында соңуна чыгышы керек. Учурда өлкөдө коронавируска каршы чараларды узартуу маселеси талкууланып жатат.

Адистер Европа өлкөлөрү чектөөлөрдүн экономикалык кесепетинен улам карантинди жумшартууга аргасыз экенин, пандемия маалында чөлкөмдө соода жана кызмат көрсөтүү тармактары катуу жабыркаганын айтып жатышат.

АКШдагы Жонс Хопкинс университетинин маалыматына ылайык, 22-ноябрда дүйнө жүзүндө коронавирусту жугузуп алганы ырасталган адамдардын саны 58 миллион 287 миңден ашты. Алардын кеминде 1 миллион 382 миңдейи COVID-19 илдетинен көз жумду.

Пикирлерди көрүңүз

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.

XS
SM
MD
LG