Линктер

ЧУКУЛ КАБАР!
21-Сентябрь, 2021 шейшемби, Бишкек убактысы 15:26

Белгисиз кишилер атып кеткен ишкердин жакындары шектүүлөрдү жоопко тартууну талап кылууда


Иллюстрациялык сүрөт.

Жалал-Абад облусунун Сузак районунда белгисиз кишилер атып кетишкен жеке ишкер Искендер Хамракуловдун жакындары 9-декабрда басма сөз жыйынын өткөрүп, кылмышка шектүүлөр жазага тартылбай жатат деп нааразылык билдиришти.

Окуядан катуу жаракат алып, оор абалда жаткан ишкердин апасы Манзура Умурзакова жана жубайы Диана Исманова акыйкат сурап, өкмөткө, ИИМге, УКМКнын жетекчилигине кайрылышты.

Манзура Умурзакова күбөлөрдүн көрсөтмөлөрү бар болгону менен күч түзүмдөрү шектүүлөрдү кармай элек экенин айтты. Ал милицияны «иштебей жатат» деп сынга алды.

Искендер Хамракуловду быйыл 3-ноябрдын түнү Сузак районуна караштуу Пахта көчөсүндө жашаган өз үйүндө атып кетишкен. Шектүүлөр беш киши болгону жана автоунаа менен келгени, ишкердин үйүнүн алдында эки ирет ок атканы айтылган.

Октун бири Хамракуловдун сол бутуна, бири кошунасынын дарбазасына тийген. Аман калган жабырлануучунун бутуна Ош шаарында төрт ирет операция жасалган. Жакындары анын абалы дагы эле оор экенин жана аны аткандар кармалбаса, өмүрү коркунучта экенин билдирип жатышат.

Жалал-Абад облустук милициясынын маалыматына караганда, окуяга байланыштуу райондук ички иштер бөлүмү адам өмүрүнө кол салуу фактысы боюнча кылмыш ишин козгогон. Учурда тергөө жүрүп жатат. Шектүүлөрдүн кармалганы маалымдала элек. (TB/NT)

Пикирлерди көрүңүз (4)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG