Линктер

ЧУКУЛ КАБАР!
4-Март, 2021 бейшемби, Бишкек убактысы 13:27

Кыргызстанда парламентаризмди колдоо кыймылы түзүлдү


Жогорку Кеңеш.

Башкаруунун бул формасын жактаган кыймыл Бишкекте 28-декабрда түзүлдү. Иш-чарага экс-президент Роза Отунбаева, «Ата Мекен» партиясынын лидери Өмүрбек Текебаев, саясатчы Бектур Асанов, юристтер Сания Токтогазиева, Нурбек Токтакунов жана бир катар саясатчылар, парламентаризмди колдогон жарандык коомдун айрым өкүлдөрү катышты.

Президенттикке талапкер, Жогорку Кеңештин мурдагы депутаты Равшан Жээнбеков кыймылдын максаты тууралуу айтып берди:

«Бардык президенттер, саясатчылар бизди алдап келишти. Кыргызстан парламентаризмде жашаган жок. Анын баары жалган сөз болгон. Биз чыныгы парламентаризмди орнотуш үчүн аракет кылалы, иштейли. Анткени дүйнөдөгү өнүгүүнүн жолу - парламентаризм. Адамды сыйлаган, ага кызмат кылган мамлекеттерде парламенттик башкаруу. Ал мамлекеттерде президенттин ролу жокко эсе, премьер-министр башкарат».

Анын сөзү боюнча, парламентаризмди колдоо кыймылы президенттик жана парламенттик системаны жактагандардын ортосунда талкуу өткөрчү аянтча болот.

2021-жылдын 10-январында мөөнөтүнөн мурдагы президенттик шайлоо менен кошо башкаруунун формасын аныктоо боюнча референдум өтөт. Бүткүл элдик добуш берүүдө жарандарга үч суроо коюлат. Ага катышкандар президенттик же парламенттик башкаруу формасын колдой турганын, болбосо бардык варианттарга каршы экенин билдириши керек.

Ушул күндөрү Конституциялык кеңешме президенттик башкарууга багытталган Баш мыйзамдын жаңы долбоорун талкуулап жатат. Аны Жогорку Кеңеш 17-ноябрда коомдук талкууга чыгарган. (BTo)

Пикирлерди көрүңүз (25)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG