Линктер

ЧУКУЛ КАБАР!
16-Сентябрь, 2021 бейшемби, Бишкек убактысы 16:19

Матраимовдордун адвокаты Лейла Байдаева Свердлов райондук сотунун судьясы болуп дайындалды


Иллюстрациялык сүрөт.

Президенттин милдетин аткарып жаткан спикер Талант Мамытовдун 6-январдагы жарлыгынын негизинде жергиликтүү сотторго бир катар судьялар дайындалды.

Алардын арасында Матраимовдордун үй-бүлөсүнүн жана «Ысмайыл Матраимов атындагы фонддун» адвокаты Лейла Байдаева да бар.

Талант Мамытовдун жарлыгынын негизинде, Лейла Байдаева Бишкек шаарынын Свердлов райондук сотунун судьясы болуп дайындалганын президенттин басма сөз кызматы билдирди.

Маалыматка караганда, президенттин милдетин аткаруучунун дарегине Соттор кеңеши тарабынан Бишкек шаарынын үч району, Нарын жана Ысык-Көл облустарынын судьялык кызматына тогуз талапкерди дайындоо боюнча сунуш келген. Мамытов аны колдоп, тиешелүү жарлыкка кол койгон. Ага ылайык, Лейла Байдаевадан тышкары Айдай Жарматова, Мирлан Жолдошбаев Бишкектин Октябрь райондук сотуна, Таалайбек Абыкеев, Алтынбек Түмөнов Свердлов райондук сотуна, Мелис Өмүралиев, Марлен Тентимишов Ленин райондук сотуна судья болуп бекитилди.

Ошондой эле Бермет Мырзаканова Ысык-Көл облустук сотуна, Замир Алыбаев Нарын облустук сотуна судья болуп дайындалды. Жарлыктар кол коюлган күндөн тартып күчүнө кирет.

Байдаева Жогорку Кеңештин депутаты Искендер Матраимов менен анын аялы Минавар Жумаеванын, «Ысмайыл Матраимов атындагы фонддун» адвокаттарынын бири.

Ал Матраимовдордун үй-бүлөсүнүн «Азаттык» радиосуна, журналист Али Токтакуновго, «Kloop.kg» жана «24.kg» сайттарына каршы жазган доо арызы боюнча иште алардын кызыкчылыгын коргоп келет. (NT)

Пикирлерди көрүңүз (28)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG