Линктер

ЧУКУЛ КАБАР!
22-Июнь, 2021 шейшемби, Бишкек убактысы 16:47

Милиция: «Кумтөрдүн» жетекчилери Кыргызстандан апрелде эле чыгып кеткен


Кумтөрдө 2019-жылдын 1-декабрында болгон кырсык. Анда эки адамдын сөөгү табылбай калган.

«Кумтөр Голд Компани» ишканасынын жетекчилери Кыргызстандан ушул жылдын апрель айында эле чыгып кеткени белгилүү болду. Бул тууралуу «Азаттык» радиосуна Ысык-Көл облустук ички иштер башкармалыгынын басма сөз катчысы Сталбек Усубакунов билдирди.

Ысык-Көл облустук милициясынын Тергөө кызматы «Кумтөр Голд Компани» ишканасынын каржы боюнча директору Саймон Танды, компаниянын президенти Деон Баденхорстты, «Кумтөр Голд Компанинин» ташып келүүлөр тутумун башкаруу боюнча директору Арипин Буманды 12-майга суракка чакырган. Алар Кыргызстандан чыгып кеткендиктен суракка барган эмес.

«Ишти териштирүү учурунда алар суракка чакырылганга чейин эле Кыргызстандан чыгып кеткени аныкталды. Ал эми бирөө такыр эле Кыргызстандын аймагына кирбептир», - деди Усубакунов.

2019-жылдын 1-декабрында Лысый жээк өрөөнүндө үйүлгөн жараксыз катмар көчүп түшкөн. Кырсык болгон учурда иштеп жаткан тоо-кен бөлүмүнүн мастери Өмүрбек Ишенбеков менен бульдозердин айдоочусу Жолдош Жунушев жер көчкүнүн астында калып, сөөгү табылбай калган.

Ошондой эле 2021-жылдын 15-февралында «Кумтөр Голд» ишканасында экскаватор айдаган Жеңиш Ибраимакунов иш учурунда экскаватору менен кошо Петров көлүнө чөгүп кетип каза болгон.

Бул фактылар боюнча Жазык кодексинин 258-беренеси («Тоо-кен, курулуш, жарылуу кооптуулугу бар же башка жумуштардын коопсуздук эрежелерин бузуу») менен кылмыш иши козголуп, «Кумтөрдүн» жетекчилери суракка чакырылган.

Кумтөр - Кыргызстандагы ири алтын кендердин бири. Аны канадалык «Центерра Голд» компаниясы иштетет, Кыргызстандын үлүшү 26% түзөт.

«Кумтөр Голд Компани» ишканасынын ишин иликтеп жаткан мамлекеттик комиссиянын жетекчиси, депутат Акылбек Жапаров 12-майда компания Кыргызстанга салык жана экологиялык санкция түрүндө 4 миллиард 252 миллион доллар төлөөгө милдеттүү экенин билдирди. (BTo)

Facebook шеринеси

XS
SM
MD
LG