Ташкентте "Борбордук жана Түштүк Азия: аймактык өз ара байланыш. Чакырыктар жана мүмкүнчүлүктөр" деп аталган эл аралык жыйын өтөт.
Расмий Ташкенттин маалыматына караганда, 15-16-июлда өтө турган жыйын президент Шавкат Мирзиёевдин демилгеси менен уюштурулууда. Негизги максаты — Борбордук жана Түштүк Азия өлкөлөрүнүн ортосундагы тарыхый достук байланыштарды, ишенимдүү жана ынак коңшулук мамилелерди бекемдөө.
Иш-чарага Өзбекстан менен Ооганстандын президенттери, Пакистандын премьер-министри, Борбордук жана Түштүк Азия өлкөлөрүнүн тышкы иштер министрлери, жогорку кызматтагы өкүлдөрү катышат. Эл аралык жана аймактык, дүйнөлүк каржы уюмдарынын, изилдөөчү жана аналитикалык борборлордун өкүлдөрү келери күтүлүүдө.
Алар аймактык байланыштарды өнүктүрүүнүн алкагында соода-экономикалык, транспорт-байланыш жана маданий-гуманитардык кызматташтыкты өнүктүрүүгө багытталган демилгелерди ишке ашыруу мүмкүнчүлүктөрүн талкуулашат.
