Линктер

ЧУКУЛ КАБАР!
24-Октябрь, 2021 жекшемби, Бишкек убактысы 05:43

Европанын соту Литвиненконун өлүмүнө Орусия жооптуу деп тапты


Александр Литвиненко. Лондон, сентябрь, 2014-жыл

Европанын Адам укуктары боюнча соту Федералдык коопсуздук кызматынын (ФСБ) мурдагы офицери Александр Литвиненконун өлүмү үчүн Орусия жооптуу деп тапты. Маркум 2006-жылы ноябрда Лондондо ууландырылган. Анын чайына "полониум 210" деген сейрек кездешүүчү радиоактивдүү зат кошулганы кийин аныкталган. Президент Владимир Путиндин сынчысы, 43 жаштагы Литвиненко бир нече күн ооруканада жатып көз жумган.

2016-жылы Британияда жүргүзүлгөн иликтөө Литвиненконун көзүн тазалоо операциясын балким президент өзү жактырган деген бүтүмгө келген. Кол салууну ишке ашырган шектүү катары ФСБнин мурдагы кызматкери, азыркы депутат Андрей Луговой жана Дмитрий Ковтундун аты аталган.

21-сентябрда Страсбургдагы сот чыгарган чечимде “кылмышты Луговой менен Ковтун жасашканы дээрлик анык”, алар “орус мамлекетинин агенттери катары аракеттенишкен” деп айтылат.

Сот орус бийлиги Британиянын версиясын төгүнгө чыгарган далилдерди берген жок жана кылмышты жакшылап тергеген эмес деп белгиледи.

Луговой менен Ковтун жана Орусия бийлиги кылмышка эч кандай тиешеси жоктугун айтып келишет.

Литвиненко 1999-жылы атайын кызматтын олигарх Борис Березовскийди жок кылууну пландап жатканын ачыкка чыгаргандан кийин Орусиядан качып кеткен.

Facebook шеринеси

XS
SM
MD
LG