Орусияда бир суткада COVID-19 оорусунан көз жумган адамдардын саны кайрадан жогорку чекке жетти.
2-ноябрда өлкөнүн коронавирус менен күрөшүү штабы алдыңкы 24 саатта 1 миң 178 киши каза болгонун, инфекция 39 миңден көп кишиден аныкталганын билдирди. Баш калаа Москвада эле бир күндө 6 миңге чукул киши инфекцияны жугузуп алган.
Вирус орус бийлиги карантин, чектөөчү чараларды киргизгенине карабай жайылып жатат. 30-октябрдан 7-ноябрга чейинки жума эс алуу күндөрү деп жарыяланган.
Пандемия башталгандан бери 146 миллиондуу өлкөдө 8,5 миллион киши COVID-19га кабылды. Өлгөндөрдүн саны 241 миң кишиге жетип, бул жагынан дүйнөдө АКШ, Бразилия жана Индиядан кийинки төртүнчү орунда турат.
Бирок штаб түздөн түз вирустан көз жумгандарды эске алса, Росстат - статистика агенттиги санактарын кеңири критерий менен жүргүзөт. Алардын 29-октябрдагы маалыматына ылайык, каза тапкандар сентябрда 462 миңдин тегерегинде болгон.
Адистер Орусияда эмдөө солгун жүрүп жатканын белгилешет.
Facebook шеринеси