Орусиянын президенти Владимир Путин коронавируска каршы вакцинанын үчүнчү дозасын алганын билдирди.
21-ноябрда "Россия 24" мамлекеттик каналына маегинде: "Эки саат мурда мага ревакцинация кылды. Эч нерсе сезген жокмун. Абалым жакшы. Баары жакшы",-деди ал.
Путин "Спутник V" вакцинасынын биринчи дозасын мартта, экинчи дозасын апрелде алган.
Орусияда 146 миллион калктын 37% гана коронавируска каршы эмделген. Пандемия башталгандан бери COVID-19 инфекциясы 246 миң адамдын өмүрүн алды. Бирок Росстат агенттиги сентябрдын соңунда бул оорудан 460 миңдей киши көз жумганын билдирген.
Орусиянын президентинин вакцина алып жаткан сүрөт, видеолору эч жакка жарыяланган эмес.