28-ноябрда шайлоонун алгачкы жыйынтыгы чыга баштаган кезде БШКнын добуштарды санаган автоматташтырылган системасы бир саамга иштебей калды. Ага чейинки жарыяланган эсепте 10 партия 5% чектен өткөнү көрсөтүлгөн. Системадагы маалыматтар жаңыланганда босого чектен өткөн партиялардын саны алтыга кыскарып, добуштардын саны да кыскарды. Бул жагдайды "Ата Мекен", "Азаттык", "Бүтүн Кыргызстан", "Улуттар биримдиги" өңдүү партиялар "көз боёмочулук" деп нааразылык билдиришти. БШКнын төрайымы Нуржан Шайлдабекова техникалык мүчүлүштүк орун алганын, Коопсуздук кеңешинин төрагасынын орун басары Таалатбек Масадыков электрондук сервердин ишине кийлигишүү болбогонун айтты.