Согуш башталгандан бери Кыргызстандын 744 жараны Украинанын аймагынан чыгарылып, анын ичинен 556 жаран Бишкекке жеткирилген. Бул тууралуу 27-июлда Кыргызстандын тышкы иштер министриЖээнбек Кулубаев билдирди.
Анын айтымында, быйыл жарым жылда Тышкы иштер министрлигинин элчиликтери менен консулдук кызматтары кыргызстандыктарга 80 миңден ашуун паспорт берүү, справка, тилкат берүү жана башка бир топ кызматтарды көрсөткөн.
Украинага Германиядан PC3O Mars II жана PzH 2000 гаубицалардын жаңы партиясы келди
Бул тууралуу Германиянын коргоо министри Кристина Ламбрехт билдирип, кийин маалыматты украин президентинин администрация башчысы Андрей Ермак да ырастады.
Mars II - америкалык M270 системасынын европалык аналогу. Бул техника Украинадагы согушта орус армиясынын чабуулун алсыраткан HIMARS системасыныкына окшош ракеталарды колдонот.
Европа Биримдигинин мүчөлөрү 1-августтан эмки жылдын 31-мартына чейин жаратылыш газын керектөөнү 15 пайызга азайтуу тууралуу макулдашты. Шаркеттин сайтындагы маалыматка караганда, бул кадам энергияны “курал катары пайдаланып жаткан” Орусиядан көгүлтүр отун келбей калат деген ыктымалдыкка даярдык иретинде жасалууда.
Дүйшөмбүдө ал өлкөнүн мамлекеттик “Газпром” ишканасы “Түндүк агым 1” куурунун дагы бир турбинасы ишин убактылуу токтоторун, аны менен аккан газдын көлөмү пландалгандан 20 пайызга азаярын эскерткен.
Германиянын тышкы иштер министри Анналена Бербок Европа Биримдиги Москванын газ "шантажына" алдырбай турганын "Эркин Европа/Азаттык" радиосуна 26-июлда берген интервьюсунда билдирди.
Бербок "Газпром" Германия менен Орусиянын ортосундагы "Түндүк агым 1” кууру аркылуу ташылган газдын көлөмүн 20 пайызга азайтканын белгилеп, Германия менен Еврошаркет Орусиянын мындай тактикасын биримдиктин мамлекеттери ортосуна чок таштоо катары баалай турганын айтты. Европа буга чейин болуп көрбөгөндөй ынтымакта турганын, азыр орус газынан көз карандылыктан кутулуунун удулу келгенин жакшы түшүнүшөрүн белгиледи.