Германиянын канцлери Олаф Шольц “Түндүк агым-1” куурунун турбинасын алып кетүүнү Орусия өзү атайылап кечеңдетип жатканын билдирди. Анын айтымында, Москва аны ташууга зарыл болчу документтерди берүүдөн баш тартып жатат.
“Муну жеткирбей коюуга эч кандай негиз жок. Алар болгону турбинаны алып кеткиси келерин айтып, Орусияга алып кетүү үчүн керектүү бажы документтерин гана көрсөтүшү керек эле”, - деди Шольц 3-августта турбинанын жанында туруп жасаган билдирүүсүндө.
Атомдук энергия боюнча эл аралык агенттиктин (МАГАТЭ) жетекчиси Рафаэл Гросси Европадагы эң чоң атомдук станция – Запорожье атомдук электр станциясынына (АЭС) байланыштуу кооптонуусун жарыялады. Ал Украинанын орусиялык аскерлер басып алган аймагында жайгашкан.
Associated Press маалымат агенттигине курган интервьюсунда, Гросси Орусия менен Украинаны эл аралык эксперттерге станцияга коопсуз кирүүсүн камсыздап берүүнү өтүндү.
Украин күчтөрү Крым менен Херсонду туташтырган темир жолго сокку урду
Украинанын куралдуу күчтөрү орус аскерлери басып алган Херсон облусу менен аннексияланган Крымды туташтырган темир жолдо курал-жарак ташып келаткан орусиялык эшелонго сокку урду. Бул тууралуу Британиянын чалгын кызматы күн сайын жарыяланчу соңку бюллетенинде маалымдап, темир жолду жакын арада калыбына келтирүү оор болорун болжоду.
Мунун алдында Украинанын Коргоо министрлигинин ыкчам командачылыгы Херсонго үч сокку жасалганын кабарлаган. Андан кеминде 20 орус аскери өлгөнү, бир нече танк, гаубица, автоунаа жана чопкутталган техника жок кылынганы такталган.
Согуш башталгандан берки биринчи кеме Украинадан Түркияга келди
БУУнун ортомчулугу менен дан ташыган биринчи кеме Украинадан Стамбул шаарына пландалгандан кечигип, шейшембиде түн жарымда келди. Ал 36 саат жол жүрүп, Босфор кысыгынын кире беришине токтоду.
Сьерра-Леоне мамлекетинде катталган, Razoni деп аталган кеме 26 миң тонна жүгөрү жүктөп, Одессанын портунан 1-августта Кара деңиз аркылуу жолго чыккан. Ал 2-августта түштөн кийин Стамбулга келери айтылган эле. Бирок аба ырайына жана суудагы миналардан улам акырын жүргөнү айтылды.