Эстониянын өкмөтү коомдук жайларда советтик эстеликтерди алып салуу жөнүндө чечим кабыл алды. Бул тууралуу "Коммерсантъ" басылмасы бул өлкөнүн бийлигине таянуу менен кабарлады.
Эстон мамлекетинде советтик мезгилде курулган жалпы 400дөй монумент бар.
“Министрлер кабинетинин отурумунда биз оккупациялык бийликтин символикалары бар мемориалдарды жок кылуу маселесин кеңири талкууладык. Башкысы чечилди – кызыл монументтер коомдук мейкиндиктен алынат, муну биз жакын арада ишке ашырабыз”,- деп жарыялады Эстониянын премьер-министри Кая Каллас.
"Газпром" газ куурунун турбинасын санкциялардан улам алып кете албай жатканын билдирди
Орусиялык газ монополисти “Газпром” компаниясы Германиянын лидеринин сөзүнө байланыштуу билдирүү таратып, “Түндүк агым-1” куурунун турбинасын Канаданын, Евробиримдиктин жана Улуу Британиянын санкциялык режимдеринин айынан алып кете албай жатканын кабарлады.
3-августта немис канцлери Олаф Шольц турбинаны алып кетүүнү Орусия өзү атайылап кечеңдетип жатканын айткан. Анын белгилешинче, Москва аны ташууга зарыл болчу документтерди берүүдөн баш тартып жатат.
АКШнын сенаты шаршембиде Финляндия менен Швециянын НАТОго кирүүсү жөнүндө келишимди ратификациялады. Документти 95 сенатор колдоду, бирөө каршы болду.
“Финляндиянын жана Швециянын мүчөлүгү НАТОну мындан да бекемдейт. Бул Украинадагы орусиялык агрессиянын, путиндик согуштун фонунда өтө актуалдуу болуп турат", – деди Сенаттын демократиялык көпчүлүгүнүн башчысы Чак Шумер.
АКШнын президенти Жо Байден бул чечимди эки партиянын НАТОну колдоодогу терең ынтызарлыгын көрсөтүү катары баалады.
Бириккен Улуттар Уюму Донецк облусундагы Еленовка шаарында туткундалып турган украин аскерлеринин өлүмүн иликтей турган болду. Бул тууралуу БУУнун баш катчысы Антониу Гутерриш билдирди. Анын айтымында, иликтөөнүн жүрүшүн Орусия да, Украина да талап кылууда.
2014-жылдан бери украиналык туткундар кармалып келген Еленовкадагы колониядагы имараттардын биринде жарылуу болгону быйыл 29-июлда белгилүү болду. Орусиянын мамлекеттик маалымат каражаттары, андан кийин Reuters агенттигинин журналисттери талкаланган имараттын кадрларын көрсөтүштү. Бул колониядагы имараттардын бири экени айтылууда. Кадрларда эки кабаттуу керебеттерде жаткан адамдардын күйүп кеткени тартылган.