Украина орус армиясынын аскердик кампаларына сокку урду
Украинанын Куралдуу күчтөрү Орусиянын армиясынын аскердик кампаларына, абадан коргонуу жана командалык пункттарына бир катар соккуларды урду. Бул тууралуу “Азаттыктын” украин кызматы Украинанын Түштүк аймактагы оперативдүү командачылыгына шилтеме берип жазды.
“Биздин ракеталык жана артиллериялык бөлүкчөлөр эки командалык пунктка, эки ок-дары кампаларына, абадан коргонуу системаларына, радар станциясына жана душмандын артиллериясы топтолгон аймактарга чабуул жасашты”, - деп айтылат маалыматта.
Украинанын президенти Владимир Зеленский түштүк облустарда оккупациялык күчтөрдү сүрүп чыгаруу үчүн контрчабуул башталганын ырастап, Орусиянын аскерлери аман калгысы келсе үйүнө кайтышы керектигин эскертти. Бул тууралуу ал соңку видео кайрылуусунда айтты.
Зеленский орус армиясы ээлеп турган жерлерди бошотуу мурдатан эле уланып келгенин, соңку суткада ал болгону жаңы секирик алганын билдирди.
“Ким биздин пландарыбызды билгиси келип жатат? Азыр силер эч кандай конкреттүү нерселерди уга албайсыңар. Анткени бул - согуш. Согушта ушундай болот. Бирок оккупанттар билиши керек, биз аларды чек арага чейин кууп чыгабыз. Эч качан өзгөрбөгөн чек арабызга чейин жеткиребиз. Оккупанттар аны жакшы билет. Эгер орус аскерлери мындан ары жашагысы келсе – качууга убакыт келди. Үйүңөгө баргыла. Эгер силер үйүңөргө, Орусияга кайтуудан коркуп жатсаңар, анда туткунга түшкүлө. Биз силерге Женева конвенцисына ылайык бардык коопсуздук кепилдик кылабыз. Эгер мени укпасаңар, анда биздин мекен коргоочулар сазайыңарды берет. Алар Украинага тийиштүү жердин баарын бошотушат”, – деди Владимир Зеленский.
Украинанын Куралдуу күчтөрү Орусиянын аскерлери ээлеп турган Херсон облусун кайтарып алуу үчүн өлкө түштүгүндө бир нече фронтто сүрүп чыгаруу жүрүштөрү башталганын 29-августта жар салган. Алар алгач HIMARS артиллериялык куралы менен аймактагы дээрлик бардык чоң көпүрөлөрдү талкалаганын, натыйжада Херсондогу орус күчтөрүнүн Крым менен байланышып толук үзүлгөнүн кабарлашкан.
Жергиликтүү Телеграм-каналдарда Херсондун атарабында тынымсыз аткылоолор башталганы тууралуу маалыматтар, сүрөт-видеолор чыкты. Соңку суткада украиндер алгач төрт конушту, кийин он чакты конушту бошотушканы маалымдалды.
Орусиянын Коргоо министрлиги украин күчтөрүнүн сүрүп чыгаруу аракеттери тууралуу комментарий бере элек. Аннексияланган Крымдын Москва дайындаган жетекчиси Сергей Аксенов Украинанын Херсон облусундагы контрчабуулдарын төгүндөп, түштүктө тескерисинче украин күчтөрү көбүрөөк жоготууларга учураганын айткан.
Украинанын Эгемендик күнүнө карата жарандык активист Адил Турдукулов согуш жүрүп аткан бул өлкөгө барып тартып келген кинотасмасын көргөздү.
Тасмада Борбор Азиядан барып, согуш башталганда Украинаны таштап кетпей жашап жаткан адамдардын жашоо-турмушу тууралуу баяндалат.
"Украинадагы кыргыз, өзбек, казак, түркмөндөрдүн жашоосун көрүп келдик. Алардын баарынын маанайы жакшы, бир мезгилдерде Украинага келип, отурукташып калганына өкүнбөй турганын айтышты. Арасында Украинанын куралдуу күчтөрүндө кызмат өтөгөн, журналист болуп иштеген, ишкерлик кылган, философтор, спорт машыктыруучулары жана Борбор Азиядан барып, жергиликтүү кеңештерге депутат болгондор бар экен. Алар Украинанын жаркын келечегине, Кыргызстан менен Украинанын ортосундагы кызматташуу жана достук мамилеси чыңдаларына ишенип турушат".
Кинотасманы көрүүгө Украинанын Кыргызстандагы элчиси Валерий Жовтенко, АКШнын Кыргызстандагы элчиси Соната Коултер жана активисттер катышты.
Тасма көрсөтүлгөндөн кийин Украинадагы согушта каза болгон жайкын тургундарды эскерип, бир мүнөттүк аза күтүү жарыяланды.
Украинанын Кыргызстандагы элчиси Валерий Жовтенко ыраазычылык катын украиналыктарды колдоп каражат топтогондорго, достук мамиленин бекем болуусуна салым кошкондорго, тасманын авторлоруна тапшырды.
Турдукулов жакында жеке репортаж тартуу үчүн Украинага барып келген. Ал карапайым калктын жашоо-турмушу Орусия басып киргенден кийин кантип өзгөргөнүн, жакындарынан айрылгандардын кайгысын, колуна курал алып туулган жерин коргоп жаткан адамдардын үмүт-тилегин көрсөтүүнү көздөй турганын айткан.
Украина бүгүн, 24-августта Эгемендик күнүн белгилеп жатат. Өлкө СССРден бөлүнүп чыкканына туура 31 жыл болду. Бул күнү Орусия украин жергесине басып киргенине толук алты ай болду.
Украин президенти Владимир Зеленский көз карандысыздык майрамына байланыштуу кенен видео кайрылуу таратып, калкты куттуктады. Ал эгемендиктин алгачкы 30 жылы менен соңку алты бир тең болгонун, Орусия аларды багынтып алууга аракет кылганы менен Украина эркин өлкө бойдон каларын билдирди.
“Бул алты айда биз тарыхты өзгөрттүк, дүйнөнү өзгөрттүк жана өзүбүз өзгөрдүк. Эми биз ким бизге дос, ким бизге душман экенин, ким жөн эле тааныш экенин жакшы билебиз. Кимдер өз атын жана репутациясын жоготкон жок, кимдер террорчулардын жүзүн сактагысы келгенин да айра таанып алдык. Кимге биздин керегибиз жок, кайсы жерде бизге дайым эшик ачык экенин да билдик. Кимдер ким экенин түшүндүк. Бүтүн дүйнө украиндер ким экенин көрдү. Украина кандай экенин да билди. Эми алар бизди жөн гана Орусиянын жанындагы өлкө деп аташпайт. Биз өзүбүздү сыйлап калдык. Кандай гана жардам болбосун өзүбүздүн эгемендигибиз үчүн өзүбүз күрөшө турганыбызды түшүндүк. Биз чындап бириктик”, – деди Владимир Зеленский.
Украин президенти Орусия менен кармашта мындан ары бир дагы аймактык ийге келишпей турганын, бир да жер берилбей турганын, Крым менен Донбассты кайрадан кайтарып алышарын кошумчалады.
Кошмо Штаттардын чалгын кызматы Украинанын Туу күнүндө жана Эгемендик күнүндө орус аскерлери инфратүзүмдөргө жана мамлекеттик объектилерге жаңы ракеталык сокку урарын эскерткен. Украиндер кечээ, 23-августта Мамлекеттик туу күнүн белгилешти.
Орусиянын аскерлери 2022-жылдын 24-февралында Украинага басып кирген. Бул аралыкта Киев 9 миңдей жоокерин жоготту. Орусия мартта 1351 аскери өлгөнүн расмий билдиргенден бери маалыматтарды жаңылай элек. Украиндер 45 миңдей орус аскери өлдү деп баалап жатышат.