11-сентябрда Орусиянын аймактарында жергиликтүү шайлоо өтүп жатат. Калининграддан баштап Бурятияга чейинки он беш аймактын шайлоочулары жаңы губернаторлорун жана аймак башчыларын шайлашат. Ошондой эле алты облуста жергиликтүү депутаттар тандалат.
Москвада жергиликтүү 125 кеңештин депутаттарына добуш берүү 9-сентябрда эле башталган.
Украинага согуш ачкыча эле Кремль бир катар көз карандысыз оппозициялык маанайдагы партияларды, кыймылдарды куугунтуктап, оозун жабууга аракет кылып келген. Байкоочулардын баамында, азыркы шайлоодо деле бийликтеги «Бирдиктүү Орусия» жана Кремлге ымала санаган ЛДПР, «Адилеттүү Орусия» жана Коммунисттик партиянын гана өкүлдөрү алдыга чыгары күтүлүүдө.
Камактагы оппозициячыл саясатчы Алексей Навальный орусиялыктарды шайлоого катышып, Путиндин режимине каршы добуш берүүгө чакырды.
Добуш берүүнүн жүрүшүнө «Голос» кыймылы көз салууда. Анын буга чейин жарыялаган баяндамасына ылайык, бул жолку шайлоо мурдагылардан эч нерсеси менен айырмаланбайт: үгүт өнөктүгүндө административдик ресурс колдонулду, добуштарды сатып алуу катталды, оппозицияны уруп-сабап кеткен учурлар болду.
Украинанын армиясы контрчабуулдун натыйжасында Харьковдун түндүк-чыгышындагы Балаклея шаарына толук көзөмөлүн орнотту. Расмий Киев 10-сентябрда Telegram каналы аркылуу Балаклеяда украин туусу илинип, аскерлер Купянскиге киргенин, Лисичанскинин босогосунда турганын, Лиман үчүн салгылашуу уланып жатканын билдирди.
Мындай билдирүү Орусиянын Коргоо министрлиги украин тарап контрчабуул баштагандан бери биринчи жолу эки багыт боюнча өз күчтөрүн чыгара баштаганын жарыялагандан кийин жасалды.
Орус Коргоо министрлигинин басма сөз катчысы Игорь Конашенков аскерлер Балаклея жана Изюм районунан Донецк облусуна жибериле турганын айткан.
Бул кадамды "атайын аскердик операциянын максатына жетүү үчүн Донецк багытында аракеттерди күчөтүү" катары түшүндүргөн.
Украинанын Коопсуздук кызматы буга чейин өз армиясы Харьков облусундагы Купянск шаарына киргенин маалымдаган.
Харьковдон 120 чакырым алыстыкта жайгашкан Купянск шаары Украинанын чыгышындагы транспорттук түйүн болуп саналат, Донбасстагы орусиялык күчтөрдү жабдуу үчүн стратегиялык мааниге ээ.
Орусия Украинага быйыл февралдын аягында басып кирген. Июлда Харьковду оккупациялагандан кийин украин армиясы бошотуу аракеттерин баштаган.
Украинанын президенти Владимир Зеленскийдин билдирүүсүндө, өлкөнүн күчтөрү жалпы 2000 квадрат километрдей аймакты бошотту.
Украин аскерлери Изюмдан видео жарыялашты
Украин армиясынын Сичеславский атындагы 25-десанттык аба бригадасынын жоокерлери социалдык тармакка Харьков облусундагы Изюм шаарынын чет жакасында тартылган видеону жарыялашты. Шаарды украин аскерлери бошоткону тууралуу маалыматтар таңдан бери айтылууда.
Украин аскер башкармалыгы түштүктө алдыга жылганын билдирди
Украинанын армиясы өлкө түштүгүндөгү Херсон жана Запорожье облустарында экиден онго чейин километр алдыга жылды. Бул тууралуу украиналык телеканалдын эфирине "Юг" бириккен аскер башкармалыгынын өкүлү Наталья Гуменюк билдирди. Ал кайсы пункттар бошотулганы тууралуу айткан жок.
