Украинанын чыгыштагы облусунун аймагында өздөрүн “Луганск Элдик Республикасы” (“ЛЭР” – “ЛНР”) деп жарыялап алган жикчил түзүмдүн Жогорку соту Европа коопсуздук жана кызматташтык уюмунун (ЕККУ) миссиясынын кызматкерин 13 жылга кести. Ал мамлекеттик чыккынчылык жана АКШнын Борбордук чалгын башкармалыгы (ЦРУ) менен кызматташкан деп айыпталган. Соттук өкүм тууралуу жикчилдер башкарган Луганск маалыматтык борбор кабарлады. Соттолгон адам Дмитрий Шабанов аттуу Украинанын жараны экени маалымдалды. Ал согуш башталган февралдан кийин кармалган ЕККУнун алты өкүлүнүн бири. Алардын үчөөнү, анын ичинде Шабановду жикчилдер дале камакта кармап келишет.
Зеленский Орусиянын аскерлеринен бошотулган Изюм шаарына барды
14-сентябрда Крым.Реалии сайты Украинанын президенти Владимир Зеленский Орусиянын аскерлеринен бошотулган Харьков облусундагы Изюм шаарына барганын жазды. Маалыматка караганда, ал шаардан орус күчтөрүн сүрүп чыгарган украин аскерлерине ыраазычылык билдирип, курман болгондордун элесине таазим кылды.
“Мурда биз өйдө караганыбызда дайыма көк асманды издечүбүз. Бүгүн биз өйдө карап, бир гана нерсени - Украинанын желегин издеп жатабыз. Биздин туу Изюмда желбиреп турат жана Украинанын ар бир шаарында, айылында болот. Биз бир гана багытта – алдыга жана жеңишке баратабыз”, - деди Зеленский.
ISW: Орусия Украинадагы согушта жеңилгенин биринчи жолу моюнга алды
АКШдагы Согушту изилдөө институту (ISW) Орусия Харьков облусунда аскерлери артка чегингенин ырастап, Украинадагы согушта жеңилгенин биринчи жолу моюнуна алганын билдирди. Бул тууралуу институттун фронттогу кырдаалды анализдеген күнүмдүк баяндасында айтылат.
Институт Кремль Украинанын армиясы орус аскерлерин Киевден жана Змеиный аралынан сүрүп чыкканда жеңилгенин моюнуна албаганын айтып, бул жолу да Харьковдо чегинишин “кайрадан күч топтоо” менен байланыштырууда деп эсептейт.
Социалдык тармактарда Украинада орус аскерлеринин катарында согушкан эки өзбекстандык туткунга түшкөнү тартылган видео тарагандан кийин Өзбекстандын Киевдеги элчилиги өлкөнүн Тышкы иштер министрлигине окуя тууралуу кенен маалымат алуу үчүн нота жөнөттү. Бул тууралуу “Азаттыктын” өзбек кызматы жазды.