Киев шаарынын Шевченко районуна урулган ракеталык соккудан сегиз киши мерт болуп, 24 жайкын тургун жараат алды. Бул тууралуу Украинанын ички иштер министринин кеңешчиси Ростислав Смирнов билдирди.
Орусиянын армиясы Киев шаарынын борбордук бөлүгүнө сокку урду
Шаар мэри Виталий Кличконун билдиришинче, жардыруулардын бири Шевченко районунун Владимир көчөсүндө болгон. Бул жер шаардын борборунда, Киев улуттук университети менен Шевченко паркынын жанында жайгашкан.
Украиналык басылмалар Киевде беш жарылуу болгону угулганын жазышты. Шаар борборуна урулган ракеталык соккудан улам каза болгондор жана жарадарлар бар экенин Украинанын Өзгөчө кырдаалдар мамлекеттик кызматы билдирди. Шаарда бир канча унаа өрттөнүп жатат. Киев облусунда абадан коргонуу системасы иштеп жатканы кабарланды.
Евробиримдиктин Украинадагы миссиясынын башчысынын Киевге келгенден кийинки сүрөтү:
Крым көпүрөсүнүн талкаланган жериндеги аймакты бүгүн 9-октябрдын таңында суучулдар изилдей башташты. Бул тууралуу Орусиянын Өзгөчө кырдаалдар министрлиги билдирди.
8-октябрда Керч кысыгындагы көпүрөдө жарылуу болгон. Автомашиналар жүргөн жолдун бир жак тарабындагы бир нече метрлик тилке талкаланып, сууга түшкөн жана поезд жүрүүчү жол да жабыркаган.
Украинанын көзөмөлүндөгү Запорожье шаарына 9-октябрга караган түнү жасалган кезектеги ракеталык катуу чабуулдун айынан кеминде 17 адам каза болгонун жергиликтүү бийлик билдирди.
Онго жакын жерде жарылуу болгонун, көп кабаттуу жана менчик үйлөр талкаланганын шаардык кеңештин катчысы Анатолий Куртев «Телеграмдагы» каналына жазды.