БУУнун өзөктүк агенттиги ушул аптада Украинада ыплас бомба жасалганы тууралуу Орусиянын айыптоолору боюнча "көз карандысыз текшерүү" жүргүзөрүн билдирди.
Атомдук энергия боюнча эл аралык агенттиктин (МАГАТЭ) башкы директору Рафаэль Гросси 27-октябрда билдиргендей, МАГАТЭнин инспекторлору өз ишин Украинанын эки жеринде жүргүзөт. Анын айтуусунда текшерүү Украинанын жазуу жүзүндөгү кайрылуусунан кийин жүрүп жатат.
Харьковдун Боровск районундагы Копанки айылына жакын аймактан адамдардын сөөгү жапырт көмүлгөн жер табылды. Жергиликтүү элдин сөзүнө караганда, аны орусиялык аскерлер чегинип бараткан кезде көөмп кетишкен. Бул тууралуу украин Улуттук полициясы маалымдады.
Көрүстөндө кеминде 17 адамдын сөөгү болушу мүмкүн. Копанкинин тургундардын айтуусунда орус аскерлери 13-апрелде эки жүк ташуучу автоунаа менен сөөктөрдү алып келген. Экскаватор менен казылган аңга сөөктөрдү ыргытып, үстүн танк менен тебелеп тегиздешкен.
Американын инфраструктурасына, анын ичинде коммерциялык спутниктерине Орусиянын чабуулу тим калбайт. Бул тууралуу бейшембидеги брифингде АКШнын улуттук коопсуздук кеңешинин өкүлү Жон Кирби билдирди. Бирок кандай жооп берилерин ачык айткан жок. Кирби ачык маалыматтарга караганда Орусия спутникке чабуул коюучу системаларды алууга аракеттенип жатканын кошумчалады.
Андан мурдараак Орусиянын Тышкы иштер министрлигинин өкүлү Константин Воронцов Орусия Украинадагы согушта колдонулуп жаткан спутниктер тууралуу маалыматтар - мыйзамдуу бута катары каралып жатканын билдирген.
Орусиянын президенти Владимир Путин дүйнө чоң окуялардын тарыхый чегинде турганын, алдыда Экинчи дүйнөлүк согуштан берки эң коркунучтуу жана маанилүү он жылдык күтүп жатканын эскертти. Бул тууралуу билдирүүсүн ал бейшемби күнү Орусияда өткөн эл аралык “Валдай” дискуссиялык клубундагы сессияда билдирди.
Мурдараак Кремлдин басма сөз катчысы Дмитрий Песков Путиндин билдирүүсүн кийин адамдар “кайра-кайра окуй” турганын айткан эле.
Орус президенти өзүнүн кебин Батыш өлкөлөрүн сындоодон баштады. Ал айырмачылыктарды жоюп салуу Батыштын табияты болуп калганын айтты.